Prokuroria e Posaçme Anti-Korrupsion ka nisur zyrtarisht hetimet për shembjen e Teatrit Kombëtar. Po kështu është caktuar prokurori i çështjes, Ervin Kondili, raporton shqiptarja.com. Thuhet se Kondili ka bashkuar dy kallëzimet e Aleancës për Mbrojtjen e Teatrit në një të vetme. Ai ka sekuestruar dokumentacionet e Bashkisë që lidhen me procesin e Teatrit si dhe vendimin e Institucionit të Ndërtimit. Përfaqësues të Aleancës për Mbrojtjen e Teatrit priten të mbërrijnë në SPAK në orën 11:00.
Sakaq është arritur një dakordësi në protestën e zhvilluar dje, që në çdo qytet të firmoset një peticion i cili synon mbledhjen e firmave për të rindërtuar Teatrin “ashtu siç ishte, aty ku ishte”.
Ditën e djeshme, regjisori Robert Budina u shpreh se: “Nesër në orën 11: 00 jeni të ftuar para SPAK, t’i nxisim të fillojnë hetimet. Nga dita e pasnesërme do dalim qytet më qytet të mbledhin firmat që Teatri të jetë aty ku duhet. Nëse nuk reagon Prokuroria, do bëjnë më dije si do veprojmë. Ne do fitojmë me paqe dhe qytetari. Se kur do të vazhdojmë në Tiranë, do ua bëjmë me dije”.
