Akademiku Artan Fuga, ka reaguar përmes një postimi të radhës në lidhje me çështjen e shumëdebatuar të Teatrit. Ai nuk nguron që të jetë i drejtëdrejtë dhe të godasë përmes një gjuhe të zgjedhur, siç ai di ta bëjë më mirë.
Mesazhin e tij të cilën e ka ndarë me të gjithë ndjekësit përmes profilit zyrtar në Facebook, ai e nis me titullin: “Për teatrin nën shi”.
Sipas tij, çështja e teatrit është e lidhur me zhdukjen e kujtesës të qytetit, me lobitë e ndërtimit, me boshatisjen e territorit të Shqipërisë nga popullsia, me zhdukjen nga faqja e dheut e kulturës shqiptare, e historisë shqiptare.
“Për teatrin nën shi!
——————————
Nën çadër, në shi, me njerëz të respektuar, e miq, Orilda, Rudi, Ervini, bashkë me ta edhe unë, për të mbrojtur ndërtesën e teatrit.
Dje vajta pashë gjoja ndërtesën e re, Turbina, për teatër. Ishte një halé e vërtetë, një kapanon, një hangar, një barrakë kampesh përqendrimi, një stallë derrash, një depo misri. Një turp.
Aty, aty, meritojnë të aktrojnë disa nga këta aktorët që na recitonin vargjet e Fan Nolit dhe na dolën karagjozë.
Turp!
As kam pikë fije dyshimi që çështja e teatrit është e lidhur me zhdukjen e kujtesës të qytetit, me lobitë e ndërtimit, me boshatisjen e territorit të Shqipërisë nga popullsia, me zhdukjen nga faqja e dheut e kulturës shqiptare, e historisë shqiptare, bashkë me të e ka pësuar e gjithë kultura, e kanë pësuar shkenca, arsimi, muzetë, sporti, kështjellat, vlerat arkeologjike që po vidhen, libri, drama shqiptare, opera shqiptare, kinemaja, gjithçka që mban shpirtin e një populli”.
