300 të vdekur dhe 600 të infektuar është aktualisht shifra që raportojnë autoritetet në Iran nga koronavirusi. Sipas autoriteteve qeveritare në Teheran, orët e fundit janë regjistruar 43 vdekje të tjera. Mes viktimave është edhe një deputet i Parlamentit në Teheran.
“Më pak se dy javë pasi u zgjodh në parlament, Mohamed Ali Ramazani ka humbur jetën pasi ishte infektuar nga koronavirusi”. Kështu raporton korrespondenti iranian i BBC-së Bahman Kalbasi, në Twitter.
Ndryshe nga Italia ku është marrë vendimi që shkollat të mos hapen edhe për një javë, në Teheran do të qëndrojnë të mbyllura për të paktën tre ditë.
Autoritetet u kërkojnë njerëzve të qëndrojnë të mbyllur në shtëpi, për të mos rënë në kontakt me virusin.
Në qytetin Bandar Abbas, në provincën jugore të Hormuzgan, një grup njerëzish të zemëruar i kanë vënë zjarrin një klinike mjekësore. Kjo pasi ishin përhapur zërat se aty kishte të shtruar me Covid-19. Protesta të ngjashme janë zhvilluar edhe në Shaft, në provincën veriore të Guilan.
