Prej disa javësh, situata epidemiologjike në Shqipëri paraqitet e qëndrueshme, teksa numri i viktimave dhe rasteve të reja me koronavirus janë ulur ndjeshëm.
Në një intervistë për ”Klan News”, mjeku infeksionist Pëllumb Pipero bëri me dije se situate në spitalet covid paraqitet mjaft e qetë, teksa shtoi se në spitalin covid 1 nuk ka asnjë pacient në intubim.
Për këtë arsye, ai mendon se Komiteti Teknik i Ekspertëve duhet të rishikojë lehtësimin e masave anti-covid, pasi edhe numri i të shëruarve është i lartë.
Pëllumb Pipero: “Situata është mjaft e qetë, incidenca ditore e rasteve të reja të infektuara është mjaft i ulët, numri është i ulët, numri i të shëruarve është mjaft i madh. Raporti është të infektuar dhe të shëruar 1 me 20 ose me 30. Numri i të shtruarve në spital, prej ditësh neve kemi 1 ose asnjë rast në ditë. Në Covid 1 kemi të shtruar rreth 33 pacientë, nuk kemi të intubuar.
Jemi në kohën e duhur për të rishikuar masat, Komiteti i Ekspertëve besoj se e ka në konsideratë numrin e rasteve të infektuara në ditë, numrin e rasteve të shëruara, numrin e rasteve që vaksinohen çdo ditë, mundësinë e ekspozimit që është shumë e ulët, që kështu në këtë aspekt mendoj që ka ardhur koha se disa nga masat mbrojtëse duhet të rishikohen”.
