Të shtëna me armë zjarri janë regjistruar mbrëmjen e sotme në qytetin e Fierit, ndërsa një makinë e tipit ‘BMW’ është gjetur e djegur pranë vendit të quajtur “Afrimi i ri”.
Nga të dhënat e para, raportohet se persona ta paidentifikuar kanë qëlluar fillimisht me armë drejt një subjekti tregtar, pjesë këmbimi të materialeve për makina, dhe më pas i është vënë flaka ‘BMW’ në periferi të qytetit.
Mësohet se mjeti rezulton me targa false dhe, brenda saj është konstatuar një armë dhe një krehër me fishekë.
Ndërkohë, grupi hetimor është ngritur dhe po punon për zbardhjen e plotë të kësaj ngjarje, identifikimin dhe kapjen e autorëve.
“Në datën 03.04.2019, në lagjen “1 Maji” Fier, në afërsi të vendit të quajtur “Kryqëzimi i Parkut”, persona ende të paidentifikuar duke udhëtuar me një mjet tip “BMV” kanë qëlluar me armë zjarri drejt një subjekti tregtar (pjesë këmbimi të makinave).
Më pas, mjetit tip “BMV” i është vënë zjarri në rrugën Fier- Seman, në vendin e quajtur “Kryqëzimi i shinave të trenit”. Në vendnngjarje kanë shkuar shërbimet e policisë dhe shërbimi zjarrfikës për shuarjen e zjarrit. Eshtë ngritur grupi hetimor dhe po punon për zbardhjen e plotë të kësaj ngjarje, identifikimin dhe kapjen e autorëve”, njofton policia.
