Mjekja e njohur, Lida Shosha ka reaguar ashpër pas vendimit të arbitrazhit për të dënuar Shqipërinë me 110 mln euro, për shkak të vendimit të kryeministrit Edi Rama për të mbyllur televizionin, Agon Channel.
Sipas saj, gjyqin nuk e nisi Shqipëria, por kryeministri të cilin ajo e konsideron si arrogant, dhe nuk ka arsye pse të penalizohen shqiptarët.
Shosha shprehet se 110 milion euro, mund të investoheshin në shumë vepra publike në dobi të qytetarëve, dhe se këtë faturë duhet ta paguajë kreu i qeverisë.
Madje, ajo deklaroi se nëse do jetë e nevojshme, Rama duhet të shesë shtëpitë dhe pronat, në mënyrë që të paguajë Becchettin, pasi është një kosto tepër e madhe për vendin.
Reagimi i mjekes Lida Losha
“Këtë gjyq nuk e nisi Shqipëria, as shqiptarët, por Kryeministri arrogant, i papërgjegjshëm, delirant. Përse duhet të penalizohen shqiptarët?!
Përse duhet të paguajmë një faturë maramendëse, kur ato lekë mund të investoheshin në shkolla, kopshte, spitale, azile, shtëpi femijësh, rrugë, ujë, infrastrukturë, transport, edukim, etj. apo për bukë e çati për qindra familje të uritura, që jetojnë mes skamjes migjeniane…. në çdo cep të ketij vendi?!
Këtë faturë duhet ta paguajë ai që e nisi, stisi dhe bitisi këtë çorbë, që iu përplas fytyrës si feçe diareike, se bota nuk të lë të shkelësh e shkatërrosh tjetrin, sepse je sovrani e bën ç’të dojë palla me vatanë…
Janë me mijëra njerëzit e këtij vendi, që punojnë ndershëm, paguajnë detyrime tatime, sigurime, taksa, ç’t’i dojë qejfi qeveritarëve, që i rrisin jo me 1%, por 100% e s’pyesin kërrkënd.
Paguajmë, madje para se të bëjmë bilancet e tjera, se shteti ka përparësi, të këput gjobë e madje të rras edhe në qeli për një faturë elektriku…
T’i gjejë ku të dojë, të shesë shtëpi , prona, pasuri dhe veten po mundi. Boll e mbytët, e shqepët, e rropët këtë milet, boll më!”
