Nënkryetari i Kuvendit, Myslim Murrizi u ka kërkuar falje të gjithë personave që janë me aftësi të kufizuara, për shkak se disa ditë më parë fyeu dikë në rrjetet sociale duke e quajtur ‘down’.
“Janë sot para mediave për të kërkuar falje publike. Kërkoj falje për të folurën time. Keqardhje për lëndimin që i kam shkaktuar. Kërkoj falje për lëndimin që ju kam shkaktuar kërkoj falje publike për të gjithë të indinjuarit nga komenti im në faqen time private i garantoj se do kenë mbështetjen time dhe përkujdesjen time”, deklaroi Murrizi.
Mirëpo pavarësisht gjithë kësaj, Murrizi e përdor këtë rast edhe për të fyer Avokaten e Popullit, e cila kishte reaguar më parë për këtë rast.
“Të mos bëjë ciu ciu me deklarata false, se ka dy vjet që e ka ngrohur karrigen dhe s’e ka ditur se ekziston ky grup social, vetëm kur të ngritën zgupthi ata që e drejtojnë dhe e çuan tek ky grup shoqëror. Të kishte folur edhe për politikanet VIP-a, që në dalje publike s’kanë lënë grup shoqëror e social pa ofenduar, duke përdorur termat “hajdut”, “qorr””, tha Murrizi.
