Bedburg – Familja Cekaj, jeton prej më shumë se dy vitesh në Gjermani, Petro (37), Valbona (27) dhe tre vajzat e tyre Ervana (shtatë), Enisa (pesë) dhe Rumejsa (4-vjeçe) janë të integruar shumë mirë. Babai punon murator, dhe mund të ushqejë familjen e tij, ndërsa nëna sapo ka nënshkruar një kontratë trajnimi, e cila do ta bënte familjen krejtësisht të pavarur nga kujdesi social shtetëror. Fëmijët flasin gjermanisht në mënyrë të përsosur, dhe kanë shumë miq bashkëmoshatarë në Ëilhelm-Busch-Grundschule dhe në Kindergarten St. Lambertus.
Letrat e shumta nuk po japin asnjë efekt
Familja e ka ndërtuar vetë jetën këtu, është e zellshme për t’ia dalë mbanë, dhe nuk dëshiron asgjë nga shteti. “Nëse i lejoni të punojnë në paqe, ata së shpejti do të jenë në një gjendje më të mirë ekonomike se shumë gjermanë këtu”- thotë Michaela Rung-Kraus, ndërsa u shkruan vazhdimisht peticione autoriteteve përkatëse.
Peticione që në fakt nuk premtojnë ndonjë gjë të mirë. Peticione, letra prekëse, dhe piktura të vizatuara nga fëmijët, për ta lejuar familjen Cekaj të jetojë në Gjermani. Ajo vjen nga Shqipëria. Vendi i tyre cilësohet kryesisht një vend i sigurt i origjinës. Ausländerbehörde (autoriteti përgjegjës për emigrantët) i distriktit Rhein- Erft-Kreis, kërcënon deportimin e saj në Shqipëri.
Aplikimi për azil është refuzuar. Familja ka bërë një gabim, dhe ndoshta disa të tilla. Për shkak se prindërit donin t’i shpëtonin fëmijët e tyre nga një deportim traumatik, ata nënshkruan një dokument ku shpreheshin se do të largoheshin vullnetarisht nga Gjermania.
Ata nuk dëshirojnë të kuptojnë vendimin e zyrës së emigracionit, meqenëse kontrata e trajnimit të Valbona Cekaj, i jep asaj mundësinë e një periudhe trajnimi për disa vite, të parashikuara nga ligjet vendase. E megjithatë kërkesa e tyre për qëndrim të përhershëm u refuzua, pasi distrikti Rhein- Erft-Kreis akuzon Cekajt, se nuk kanë qenë bashkëpunues.
Ata do të duhej të merrnin pasaportat për largimin e tyre. Gjë që nuk e bënë. Kjo është arsyeja pse Gjykata Administrative e Këlnit, ka refuzuar një kërkesë urgjente për të detyruar distriktin Rhein- Efrft të tolerojë.
“Ajo është një nga ne”
4-vjeçarja Amilia Kraus ka ngjitur një foto në një copë letër, të cilën ajo na e tregon së bashku me mikeshën e saj Rumejsën. “Ajo na përket neve”- shkruhet në letrën e përgatitur nga vogëlushet, me lloj-lloj ngjyrash pranë fjalëve. Shtatëvjeçari Leëin Kraus, i shkroi Ministrit të Brendshëm të landit, Herbert Reul, për shoqen e tij të klasës, Ervana: “Ajo duhet të ketë të drejtën të qëndrojë me ne!”.
Prindërit kanë mbledhur nënshkrimet e fëmijëve në kopshtin dhe shkollën e fëmijëve të tyre. Deri më tani janë mbledhur 150 të tilla. Johanna Münch, bashkëpunëtore e asgjensisë këshillimore për emigrantët që përballen me deportimin “Diakonie” në Köln, ka paraqitur një kërkesë në komisionin e rasteve të vështira në Ministrinë e Brendshme.
Në deklaratën shpjeguese, ajo përpiqet, me ndihmën e një dëshmie të Dagmar Harf, një vullnetari në ndihmë të familjes shqiptare, për të provuar se ka pasur një keqkuptim në lidhje me çështjen e pasaportave, gjatë bisedës midis autoritetit të emigracionit dhe Valbona Cekajt.
“Ne kemi nevojë për një engjëll”- thotë Michaela Rung-Kraus, duke ditur se mundësitë ligjore janë shterur, dhe se autoritetet e emigracionit këmbëngulin në qëndrimin e tyre. Cekajt ishin shumë të mirë, shumë të rregulluar, shprehet Rung-Kraus. “Nëse ata do të krijonin më shumë zhurmë rreth vetes, do të ishin më të zëshëm, do të ndihmoheshin”.
Çfarë do të thotë një kthim në Shqipëri?
Valbona Cekaj ngre supet. Familja ka ardhur këtu nga qyteti i vogël i Shkodrës në veri të Shqipërisë. Babai i bashkëshortit të saj, qëndroi atje pasi u angazhua në fushatën zgjedhore si kandidat i Partisë Socialiste, ndërsa i biri e mbështeti në fushatë. Për shkak të kësaj u përball me presione, Petro Cekaj humbi, ndërsa familja u kërcënua.
Në këtë situatë ata braktisën vendin. “Nëse kthehemi atje, kjo që kemi sot nuk mund të jetë më jeta jonë, pasi do të ishim të izoluar në aspektin shoqëror”. Cekajt dhe miqtë e tyre gjermanë, shpresojnë tani tek disa politikanë që i kanë informuar mbi situatën, sikurse është edhe Georg Kippel, një anëtar i Bundestagut gjerman.
Ai është një avokat në profesion. Dhe si i tillë, pas studimit të dosjes ai shprehet: “Familja i ka shteruar të gjitha mjetet juridike me mbështetjen ligjore. Rasti është i vështirë, por e drejta është në anën e autoriteteve të emigracionit”.
Përshtati për Tirana Today, Alket Goce
