Kreu i grupit parlamentar të Partisë Socialiste, Taulant Balla ka sulmuar sot sërish kreun e PD-së, Lulzim Bashën.
Me anë të një postimi në Facebook, Balla shkruan se Basha vazhdon të bëjë hetuesin dhe prokurorin, ndërsa nuk i përgjigjet pyetjes së përse mori në mbrojtje kryebashkiakun e Mallakastrës, duke shkelur ligjin për herë të dytë.
Duke iu referuar çështjes së Tahirit, Balla shkruan se i takon drejtësisë ta zbardhë ndërsa shton se Basha kujton se do mashtrojë demokratët duke u kapur “si i mbyturi pas fijes së barit”.
Së fundmi, kreu i grupit të PS-së merr në mbrojtje Policinë e Shtetit, teksa akuzon Bashën se po shpif ndaj saj.
POSTIMI I BALLËS:
Lulzim Basha vazhdon të bëjë hetuesin, prokurorin, gazetarin dhe të mos i pergjigjet pyetjes pse e mbrojti kryebashkiakun e Mallakastrës, duke shkelur ligjin e tij “të dashur” të dekriminalizimit për të dyten herë!
Është hera e dytë që Lulzim Basha merr në mbrojtje njerëzit e tij të kapur me presh në duar dhe është e hera e dytë që refuzon të marrë përgjegjësinë si Kryetar në detyrë i PD.
Luli i shkretë kujton se do të mashtrojë përsëri demokratët, duke u kapur si i mbyturi pas fijes së barit me një histori që i takon drejtesisë, aspak Lulit, që ta zbardhë deri në fund.
Shpifjet e tij për Policinë e Shtetit janë përpjekjet e dëshpëruara të një njeriu të deshperuar, nderkohë qe Policia e Shtetit ka bere detyrën duke dhënë një tjetër shembull të qartë se per ne e për Qeverinë tonë s’ka dy standarde, sic ka për Lulzimin kur vjen puna për të zbatuar ligjin e dekriminalizimit!
