11 korriku i vitit 1978, nisi si një dite e zakonshme vere në plazhin Los Alfaques pranë Tarragonas në Spanjë. Mbi 1 mijë pushues vendas dhe të huaj, ndodheshin në breg duke marrë rreze dielli, apo duke u larë. Pak pas mesditës në një rafineri aty pranë, një kamion-cisternë u ngarkua me 23 ton gaz të lëngshëm propilen, tejet i ndezshëm. Ai ishte mbushur 4 ton më shumë se sa kapaciteti maksimal, dhe kjo do të ishte fatale.
Shoferët e cisternave, ndiqnin zakonisht një rrugë dytësore, për të shmangur trafikun e madh që shkaktonte sezoni turistik. Kamioni me propilen, po kalonte përbri plazhit, kur për shkak të temperaturës mbi 35 gradë, dhe presionit të madh brenda cisternës, gazi shpërtheu në orën 14:35.
Shumë shpejt atë, e pasoi një zjarr i madh që shkrumboi çdo gjë, makina dhe ndërtesa, brenda një rrezeje prej 300 metrash. 157 njerëz gjetën vdekjen e menjëhershme, dhe mbi 300 të tjerë u plagosën. Si pasojë e plagëve të rënda, bilanci total i viktimave të asaj tragjedie, shkoi brenda disa orësh në 217.
Ndërkohë që gjatë muajve të ardhshëm do të vdisnin njëri pas tjetrit edhe 53 të tjerë, duke e çuar në 270 numrin total të viktimave. Prej tyre vetëm 4 ishin spanjollë, gjithë të tjerët ishin turistë të huaj. Shumë nga viktimat ishin djegur aq shumë sa nuk mund të njiheshin.
Në atë kohë nuk ekzistonte ende testi i AND-së. Ndaj disa trupa u identifikuan deri disa vite më vonë. Të tjerët, u varrosën si të paidentifikuar, dhe mbeten ende sot të tillë./ TIRANA TODAY
