Drejtori sportiv i Lazios, Igli Tare, duket se është në të njëjtën linjë me tenorin shqiptar me famë botërore, Saimir Pirgu, referuar akteve të dhunës gjatë protestës së opozitës, dhe imazhit negativ të krijuar.
I ftuar në emisionin ‘Porta a Porta’ të gazetarit Bruno Vespa, kushtuar situatës aktuale politike në Shqipëri, Tare shpreson që opozita të kthehet në Parlament, dhe të zgjidhë aty problemet. Duke qëndruar në të njëjtën linjë, ai shtoi se Shqipëria ka vuajtur shumë në të kaluarën, dhe njerëzit tanë meritojnë çdo të mirë.
“Shpresoj që opozita të kthehet në Parlament, për të diskutuar problemet që kemi. Dy ditë më parë kam lexuar një intervistë nga një artist i njohur shqiptar, i cili duke iu referuar imazhit të një gome të djegur përpara Parlamentit, deklaronte se do ti duheshin të paktën 200 koncerte për të pastruar imazhin e vendit.
Mendoj të njëjtën gjë, Shqipëria ka vuajtur shumë në të kaluarën dhe njerëzit tanë meritojnë çdo të mirë. Ne jemi pro Evropës dhe në rritje, kështu që problemet duhet të zgjidhen në shtëpi, dhe me përgjegjësi të madhe”.
