Suksesi me të rinjtë e Interit është rezultat i një pune, përkushtimi dhe pasioni. Ai është Armand Rada dhe luan në radhët e Inter Primaveras, ku pak ditë më parë u kurorëzua me trofeun e Superkupës së Italisë. Shqiptari 19-vjeçar më parë ishte larguar nga ekipi zikaltër, por pas shtatë vitesh kuptuan gabimin që kishin bërë dhe e rikthyen. Në një intervistë për Panorama Sport, lojtari i Kombëtares shqiptare U-19 ka treguar për sakrificat, ëndrrat, objektivat dhe të admiruarit e tij.
Karriera e talentit shqiptar ka nisur në moshë fare të vogël në Itali, në moshën 6 vjecare ishte pjesë e skuadrës së Olginatese (liga e katërt italiane), ndërsa si dhjetëvjeçar kaloi te të rinjtë e Interit ku qëndroi për tre vite. Për çështje teknike, për të fituar përvojë, zikaltrit e larguan.
Mirëpo, ai nuk hoqi dorë nga ëndrra për të luajtur me Interin dhe shtatë vite pas largimit, u kthye te Akademia e Nerazzurrëve. “Të fitosh diçka është emocionuese, por kur e bën në San Siro është magjike. Përpara disa kohësh këtë stadium e shihja në televizor dhe të luaja aty ishte ëndrra ime. Nuk kam fjalë për ta përshkruar atë emocion që përjetova. Kur dëgjova fërshëllimën e arbitrit isha shumë i lumtur, sepse ky ishte trofeu i dytë me Interin. Shpresoj të vijnë të tjerë në të ardhmen. U emocionova shumë, sepse në stadium ishte edhe familja ime”, ka thënë Rada në lidhje me triumfin në Superkupën e Italisë për të rinjtë.
Ëndrra e madhe e Armandit është që një ditë të jetë pjesë e ekipit të parë të Interit. “Por, për momentin, dua thjesht të bëj mirë me skuadrën që jam aktualisht dhe të punoj dita ditës. E di që rruga është shumë e gjatë dhe as dua të mendoj në këto momente”, është shprehur ai.
Si cdo interist edhe Armandi nuk mund ti shpëtonte dashurisë për idhullin Javier Zanetti, i cili është lojtari i tij që merr si shembull. “Jo vetëm unë, por shumë shokë të skuadrës kanë atë. Ai është njeri i mrekullueshëm dhe ka qenë lojtar fantastik. Nuk kam parë kurrë një person të tillë… E takoj sepse ai i qëndron shumë pranë ekipit të parë të Interit, por edhe të rinjve. E kam takuar disa herë”, ka theksuar 19-vjeçari.
Te Kombëtarja shqiptare, i zgjedhuri i tij është Lorik Cana. “Atë e kam parë më shumë, sepse ka luajtur në Itali. Më pëlqente personaliteti dhe dashuria që transmetonte për fanellën, e cila është shumë e rëndësishme. E kam takuar atë në Shqipëri kur bëmë një grumbullim”, ka deklaruar mesfushori i ri.
