Arton Zekaj, i lindur në Beograd dhe me prindër kosovarë, nuk e ka vendosur ende se për cilën kombëtare do të luajë.
18-vjeçari Zekaj është kapiten i grupmoshave serbe, pjesë e kampionatit francez dhe aktivizohet me skuadrën e Lilles. Mesfushori i talentuar ka dhënë së fundmi një intervistë për mediat në Beograd, duke i dërguar një mesazh të fortë Serbisë.
Ai është shprehur për Kurir, se nëse nuk e thërrasin në Kombëtaren Serbe, do të vijojë karrierën me Kombëtaren e Kosovës.
“Është e vërtetë që kam qenë kapiten te moshat e Serbisë dhe nuk jam ftuar në ndeshjet e fundit. Nuk e di çfarë të them, kam qenë në dispozicion të përzgjedhësve, por që nuk kishte thirrje. Nuk e di çfarë ka ndodhur. Jam kontaktuar nga trajneri Ilija Stolica dhe më tha se dëshironte t’i provonte disa lojtarë të tjerë. Por edhe pasi provuan lojtarët mua nuk më ka ardhur asnjë ftesë. Kam një telefonatë nga Kosova, më kanë kërkuar të luaj për ta. Do të luaj për ata që më duan më shumë, do të doja të vazhdoja me ata që kam nisur, por nëse nuk më duan nuk kam se çfarë të bëj. Unë do të luaja për Serbinë, unë aty kam lindur dhe jam rritur, kam kaluar nëpër të gjitha grupmoshat dhe natyrisht se do të luaja për ta. Prindërit e mi kanë lindur në Kosovë. Nëse nuk do të kem ftesë nga Serbia atëherë do të luaj për Kosovën”, përfundoi Zekaj.
