Ministri për Europën dhe Punët e Jashtme, Gent Cakaj, gjatë një intervistë për televizionin T7, ka folur për taksën në Rrugën e Kombit.
Në deklaratën e tij, ai për këtë taksë ka fajësuar ish-kryeministrin Sali Berisha. Duke folur përmes shifrave, ai ka thënë se i gjithë ndërtimi i autostradës ka kushtuar 1.3 miliardë dollarë. Po kështu, koncesionarit për mirëmbajtje i duhet të shtojë 260 milionë dollarë.
“Fajin për nënshkrimin e kontratës me koncesionarin në vitin 2011 e ka qeverisja e kaluar. I gjithë ndërtimi i autostradës ka kushtuar 1.3 miliardë dollarë. Koncesionarit për mirëmbajtje i duhet të shtojë 260 milionë dollarë.
Kjo për shkak të ndërtimit të urës përmbi lumin Drin, rrugëve dytësore, 25.6 kilometra rrugëve me korsi shtesë. 16 km rrugë dytësore, ndriçimi etj… Taksa e qarkullimit nuk arrin me i shlyer borxhet paraprake të qeverisë së kaluar”, u shpreh ai.
Cakaj ka shtuar më tej se Rruga e Kombit është ndërtuar me borxhe, dhe ajo ende nuk ka mbaruar. Ministri ka deklaruar se 37% të parave janë marrë borxh nga qeverisja e kaluar për Rrugën e Kombit, dhe ajo nuk ka mbaruar ende.
“37% të parave janë marrë borxh nga qeverisja e kaluar për Rrugën e Kombit, dhe ajo nuk ka mbaruar ende. Vetëm vitin e kaluar, 1.73 miliardë dollarë janë shpenzuar për mirëmbajtjen e rrugëve në Shqipëri”, përfundoi ai.
