Deputetja e Partisë Demokratike, Rudina Hajdari ka treguar se çfarë është diskutuar në takimin e zhvilluar ditën e sotme me deputetët e opozitës parlamentare.
Përmes një postimi në “Facebook”, Hajdari bën me dije se takimi u përqendrua në Reformën Zgjedhore, ndërsa theksoi se u ndanë opinione të ndryshme sa i përket sistemit zgjedhor dhe ndryshimeve në Ligjin për Partitë Politike
“Sot zhvilluam një takim me të gjithë kolegët deputetë të opozitës parlamentare, ku tema kryesore që u diskutua ishte Reforma Zgjedhore.
Gjatë këtij takimi u ndanë opinione të ndryshme në lidhje me sistemin zgjedhor dhe ndryshimet e nevojshme në Ligjin për Partitë Politike, si dhe cështje të tjera që kanë të bëjnë me Reformën Zgjedhore.
Ndryshimi i këtij sistemi të kalbur që cënon demokracinë e vendit cdo ditë, është thelbësor dhe prioritet për opozitën, sepse ka ardhur koha që qytetarët shqiptarë të ndihen të përfaqësuar”, shkruan Hajdari.
