Kryetari i Partisë Demokratike, Lulzim Basha e ka konsideruar si protagonizëm të tepruar takimin midis kryeministrit Edi Rama, homologut maqedonas Zoran Zaev dhe presidentit Aleksandër Vuçiç në Shkup, në kuadër të Forumit Ekonomik të Ballkanit.
Deklarata e Bashës u bë ditën e sotme, pas takimit në selinë blu me kreun e Komunës së Bujanovcit në Preshevë, Nagip Arifi. Basha u shpreh se lëvizja e lirë e njerëzve dhe mallrave, është një përparësi e kërkesë e të gjitha vendeve, dhe Partia Demorkatike e ka mbështetur.
Teksa përmendi spastrimin etnik të shqiptarëve në Bujanoc, Basha u shpreh se nuk dihet nëse Rama e ka diskutuar këtë temë me Vuçiç, por nëse e ka bërë diçka të tillë, po e mban sekret.
Lulzim Basha: ”Nuk e kuptojmë pse po bëhen këto takime, e një protagonizmi të tepruar. Që lëvizja e lirë të funksionojë t’i japim fund hiprokrizisë të punohet për njohjen e ndërsjelltë dhe lehtësimi i lëvizjes së lirë është një përparësi e kërkesë e të gjitha vendeve. Kanë dëshirë për të dalë e për të bërë fotografi s’është çudi po të kursejnë një film të parë e stërparë për shqiptarët. PD e ka mbështetur e mbështet dialogun por s’kemi lënë dilemë për përfundimin e tij, që është njohja e ndërsjelltë. Në prani të kreut te komunës së Bujanovcit, asnjë takim s’mund të shërbejë si alibi për t’i ikur detyrimeve kushtetuese për t’u kujdesur për shqiptarët kudo ku janë. Në Bujanovc shqiptarët cregjistrohen në mënyrë të paligjshme për të bërë një spastrim luginës së Preshevës. Nuk di sa kohë i ka kushtuar Rama këtij problemi me mikun e tij Vucic, por nëse ka folur na e ka mbajtur shumë sekret.”
