Ditën e djeshme, kryetari i PD-së Lulzim Basha është takuar me presidentin e ri të Partisë Popullore Europiane Donald Tusk. Me anë të një postimi në facebook, Basha ka hedhur dritë mbi bisedën që ka pasur me Tusk. Sipas tij, Tusk është një mbështetës i madh i vendit tonë në rrugën e integrimit.
Basha dhe Tusk kanë shprehur angazhimin e përbashkët për plotësimin e kushteve për hapjen e negociatave. Ai i ka premtuar Bashës angazhimin maksimal dhe për vizituar së shpejti vendin tonë.
“Pata kënaqësinë të bashkëbisedoja dhe t’i uroja suksese Presidentit të ri të Partisë Popullore Europiane, Donald Tusk, një mbështetës i jashtëzakonshëm i Shqipërisë dhe shqiptarëve në rrugën e integrimit në BE.
Ndava me Presidentin Tusk vendosmërinë time për të luftuar fort për plotësimin e të gjitha detyrimeve që vendi ynë ka për hapjen e negociatave, dhe për të bindur me rezultatet e punës tonë vendet skeptike, siç kemi bërë për anëtarësimin në NATO dhe heqjen e vizave.
Gjeta mbështetjen e plotë dhe gatishmërinë e Presidentit Tusk për të na ndihmuar në këtë proces transformimi rrënjësor të vendit tonë, duke vendosur në Shqipëri standardet e Bashkimit Europian, zgjedhje të lira dhe të ndershme, funksionimin e shtetit ligjor, barazinë para ligjit, luftën kundër korrupsionit, ndarjen e politikës nga krimi dhe zhvillimin ekonomik.
Presidenti Tusk theksoi se në një betejë politike, e vërteta dhe vendosmëria do të triumfojnë kundër lajmeve të rreme, manipulimeve dhe urrejtjes, ndërsa shprehu angazhimin për ta ndihmuar Shqipërinë të thotë të vërtetat e saj larg propagandës. Presidenti i PPE, mirëpriti ftesën time për të vizituar së shpejti vendin tonë”, shkruan Basha.
Basha: Për të përmbushur vizionin tonë, ne duhet të punojmë së bashku
