Lidhja mes Mesit dhe Katarit (PSG-së) është gjithmonë dhe më e fortë. Kështu informoi emisioni sportiv “El Chiringuito” duke raportuar se Horge Mesi (i ati i lojtarit dhe njëkohësisht agjenti i tij) është takuar javën e kaluar me disa drejtues të këtij grupi në Barcelonë.
Ky takim mund ta afrojë më shumë kapitenin e katalanasve me PSG-në, klubi i cili është shfaqur në horizont si skuadra e ardhshme e argjentinasit. Për momentin, francezët duken shumë përpara Mançester Sitit të Guardiolës. Fondi i Katarit, i drejtuar nga Naser Al Khelaifi dhe forca ekonomike që kanë e bëjnë të besueshëm kalimin e Lionel Mesit në Francë.
Prej kohësh po flitet për një transferim të mundshëm të tij te PSG-ja, por i menjëhershëm ka qenë reagimi i babait të tij. Horge Mesi thotë se nuk ka pasur asnjë takim. Ai thotë se që prej shtatorit ndodhet në Argjentinë dhe nuk ka udhëtuar kurrë drejt Europës.
“Nuk është e vërtetë. Një tjetër shpifje. Unë që nga shtatori ndodhem në Argjentinë”, shkruan babai i Mesit në profilet e tij në rrjetet sociale.
