Ish-ministri i Brendshëm, Saimir Tahiri, konfirmoi përmes një deklarate për mediat se në Itali ka rezultuar i pafajshëm. Ai publikoi vendimin e gjykatës italiane, se në vendin fqinj janë mbyllur hetimet me vendim të formës së prerë. Me tone të ngritura, Tahiri dha arsyet pse kishte zgjedhur të heshte për një kohë të gjatë, e i dhënë një shuplakë të fortë të gjithë atyre që e kanë akuzuar.
Në morinë e akuzave, Tahiri përmendi kryedemokratin Basha, e kryetaren e LSI-së Monika Kryemadhi. Tahiri tha se heshtja e tij justifikohet me faktin se kishte zjedhur që të bënte politikanin. Kjo nuk ka qënë aspak e lehtë, pasi të gjithë e kishin vënë me shpatulla pas murit. Po kështu, ish-ministri tha se jeta e tij nuk ishte si më parë, pasi të gjithë i bënin gjyqin.
“Janë 6 muaj nga hera e fundit që kam folur për mediat, dhe më shumë se 1 vit nga koha që ka nisur. Kam heshtur në respekt të hetimeve, dhe pse i vetmi që ka heshtur jam unë. Nëse do kisha zgjedhur të bëja politikanin, nuk do i kisha lënë rrënjë e as dhëmballë të gjithë atyre që kanë folur, pa kursyer as ata që kanë hetuar.
Unë zgjodha të mos bëja politikanin siç kanë bërë të gjithë ata që kanë qeverisur. Kanë vrarë, kanë vjedhur dhe nuk janë hetuar, gjykuar kurrë, por kanë marrë me libër llogarie dhe libër shtëpie, prokuror e gjyqtar, media e gazetarë deri sa kanë dalë pa lagur. Zgjodha të bëj qytetarin e thjeshtë. Të mos bëj politikë e të pres hetimet. Për fat të keq, i vetmi që kam heshtur jam unë”, tha Tahiri.
Ish-ministri i akuzuar për “trafik droge” është shprehur se ‘ka një dorë të zezë’ që ia ka bërë këtë dhe e ka sulmuar gjithmonë.
“Më 24 tetor 2017 deklarova në media se ndaj meje s’kishte asnjë hetim. Atëherë ajo dora e zezë lëvizi fort për të thënë se letrat ishin të falsifikuara. Prokuroria antimafias italiane regjistroi një hetim ndaj meje tre ditë më pas. Ky institucion i kërkoi gjykatës italiane pushimin e hetimeve për Tahirin, se nuk është i përfshirë në aktivitet të paligjshëm. Sot kam vendimin e gjykatës. Jam i pafajshëm”, u shpreh Tahiri.
