Ish-ministri i Brendshëm, Saimir Tahiri, në një prononcim për mediat tha se bëri zgjedhjen e tij duke votuar, ndërsa nënvizoi ndër të tjera se qytetarët shqiptarë nuk e meritojnë këtë situatë të tensionuar që po jetojnë.
“Kam ardhur për të votuar, është një e drejtë e imja kushtetuese dhe e çdo qytetari, do doja që kjo të mos kishte ndodhur. Shpresoj që kryetarët e bashkive që do zgjidhen, të punojnë për shqiptarët pa dallim”, tha ai.
Duke u ndalur edhe tek incidentet që kanë shoqëruar këto orë procesin zgjedhor, Tahiri deklaroi se askush nuk e meriton të përjetojë këto orë ankthi.
“Unë uroj që të shkojnë të gjitha mirë. Shqiptarët nuk e meritojnë të shikojnë gjithë këto tmerre në televizion”, përfundoi ish-ministri.
