Ish-zv.kryeministrja e Kosovës, Edita Tahiri, ka folur për zgjedhjet vendore në Shqipëri dhe për pjesëmarrjen e ulët. Tahiri i cilëson këto zgjedhje moniste, teksa pretendon se kryeministri Edi Rama u ndëshkua edhe për lojërat e rrezikshme për kufijtë e Kosovës.
Ajo ndër të tjera shkruan në Facebook se qytetarët dëshmuan se civilizimi jonë si komb shqiptar është i lashtë. Në të njëjtën kohë, Tahiri shprehet se ndjehet e dëshpëruar se këto zgjedhje ishin një kthim pas nga arritjet 30 vjeçare, për demokraci dhe pluralizëm në Shqipëri.
Duke qëndruar në të njëjtën linjë, Tahiri citon se bojkoti i këtyre zgjedhjeve nga më shumë se 80 përqind e votuesve, nuk ishte gjë tjetër veçse ndëshkim i fortë ndaj Ramës.
Statusi
“Rama u ndëshkua edhe për lojërat e rrezikshme për kufijtë”. Me vemendje përcolla zgjedhjet moniste të nivelit lokal dje ne Shqipëri. E lumtur që kaluan në një atmosferë civilizuese, qytetaret dëshmuan se civilizimi jonë si komb shqiptar është i lashtë. E dëshpruar, se këto zgjedhje ishin një kthim prapa nga arritjet 30 vjeqare për demokraci dhe pluralizëm në Shqipëri. Vetë fjala “zgjedhje” don të thotë që qytetari duhet të ketë mundësinë të zgjedh mes disa alternativave, ndaj ky edhe është një parim themelor i demokracisë. Dalja minimale e qytetarëve në këto zgjedhje dhe bojkoti i tyre nga më shumë se 80 përqind e votuesve, ishte një ndëshkim i fortë ndaj Edi Rames për shumë arsye. Rama u ndëshkua edhe për lojërat e rrezikshme për kufijtë, që do ta dëmtonin shtetin e Kosovës.
