Presidenti i zgjedhur dhe ish-kryetari i LSI-së, Ilir Meta i bëri një vizitë shtetasit Gjovalin Gjini i cili u dhunua dy ditë më parë. Gjini është një prej përkrahësve të LSI-së në Lezhë.
Ajo që ka rënë më shumë në sy, është momenti kur pas vizitës në shtëpinë e simpatizantit të dhunuar të LSI-së, ish-kryetari i Bashkisë njëkohësisht kandidati për deputet i Lezhës, Viktor Tushaj, i fut në xhep Gjovalin Gjinit një zarf.
Kjo ka ngritur në fakt dyshime të shumta, ç’përmbante në të vërtetë ai zarf. Video është publikuar nga ish-ministri i Brendshëm Saimir Tahiri në “Facebook”-un e tij personal, ndërsa nuk ka bërë koment shoqërues lidhur me përmbajtjen e zarfit duke shkruar vetëm se “Shih e shkruaj thotë populli, se sado të shkruash kur sheh kështu skenash, çdo fjalë është e tepërt…”.
Por menjëherë pas publikimit të videos ka reaguar dhe kandidati për deputet i Lezhës, Viktor Tushaj shkruan në Facebook se “Zakoni i malësorit, zadrimorit, mirditorit dhe i gjithë shqiptarëve është që në raste tilla filxhani i kafes nderohet. Unë së bashku me miqtë e Gjovalinit tërë jetën tone e kemi respektuar dhe do ta respektojmë këtë traditë të bukur. Nëse dikush i ka harruar këto vlera është turpi i tyre. Respekt për këtë familje të nderuar dhe për të gjithë ata që i nderojnë këto vlera!”
