Përballë do të jetë kampionia e botës dhe për Shqipërinë mjafton emri që të regjistrohet si përballje e vështirësisë maksimale. Luhet një ndeshje e rëndësishme për ecurinë dhe rrugëtimin drejt Europianit.
Ndonëse në letër ka një lloj “qetësie”, teksa yje si Mbape e Pogba nuk do të jenë në dispozicion të Deshamps, është prestigjiozja franceze “Le Figaro” që surprizon: “Pritet ‘SOLD OUT’ ndaj Shqipërisë. Deri më tani, shifrat e biletave të shitura kanë kaluar 70,000 në një impiant që përmban 80,698 të pranishëm”. Një fakt i rëndësishëm dhe duket se publiku francez do të jetë i pranishëm në stadium për të mbështetur “Gjelat” në dy ndeshjet e radhës që kanë.
Franca është në kuotën e nëntë pikëve, teksa rihapi çështjen e kualifikimit me humbjen ndaj Turqisë, dukë bërë që në garë të ketë tri skuadra. Për përballjen e radhës që Franca do të luajë sërish në shtëpi ndaj Andorras, deri më tani raportohen mbi 40 mijë bileta të shitura dhe pritet interesim i lartë edhe në ditët e fundit para nisjes së sfidës. Nëse prania e shqiptarëve në Francë dhe shtetet evropiane është e madhe, gjë që konsiderohet diçka pozitive, pasi shumë prej tyre me pasaporta të huaja mund të blejnë bileta, fakti që i gjithë stadiumi do të jetë i tejmbushur do të shtojë së tepërmi presionin drejt kuqezinjve. /Panorama
