Mbyllen në barazim pa gola dy ndeshjet e luajtura mesditën e sotme, në kuadër të javës së tretë të kampionatit shqiptar. Vllaznia me shumë probleme nuk arrin të marrë më shumë se një pikë në Gjirokastër përballë Luftëtarit. Bluzinjtë dhe skuadra e Armando Cungu u kënaqën me nga një pikë në ndeshjen e javës së tretë ku luajtën një 90 minutash të varfër në ide dhe lojë. Pak fantazi nga vendasit dhe po ashtu pak cinizëm nga miqtë në pjesën e parë që nisi nën ritëm. Luftëtari dhe Vllaznia numërojnë nga 4 pikë pas 3 javëve të para të Kategorisë Superiore.
Edhe në sfidën tjetër e luajtur në stadiumin asnjanës në Fier, mes dy ekipeve të reaja të Superligës Lushnjes dhe Kamzës nuk u shënuan gola. Të dy ekipet janë mjaftuar me nga një pikë, ku lushnjarët regjistrojnë pikën e parë këtë sezon. Një lojë e dobët nga të dyja ekipet dhe shumë pak fantazi. Lushnja vazhdon të mbajë vendin e fundit por tashmë me një pikë, ndërsa Kamza e ka barazimin e dytë pas asaj surprize me Skënderbeun. /Tirana Today
