Kemi dëgjuar histori nga më të ndryshmet për lojtarë të famshëm, të cilët kanë vuajtur shumë, por falë pasionit dhe punës së madhe, ata kanë arritur të bëhen milionerë dhe të suksesshëm.
Një rast i tillë është shumë pranë nesh, pikërisht te skuadra e Tiranës, ndërsa historinë e tij të dhimbshme, e ka rrëfyer shkurt vetë futbollisti. Bëhet fjalë për Junus Sentamun, lojtarin nga Uganda, i cili ka rrëfyer se dikur shiste misra dhe peshk që të mund të blinte këpucët e futbollit.
Jeta e tij ka qenë mjaft e vështirë, ndërsa që kur ishte i vogël, ai i kishte premtuar së ëmës që do ta nxirrte nga varfëria ekstreme. Lojtari i bardhebluve e ka ndarë më ndjekësit e tij në rrjetin social Instagram, ku falënderon Zotin për çdo arritje.
“Dikur shisja peshk dhe misër që të mund të blija këpucët e futbollit. Familja ime ishte kaq e varfër, saqë futbollin e nisa për mbijetesë. I thashë mamasë sime kur isha në një moshë fare të vogël: mos u shqetëso, do të bëhem një futbollist dhe do të të nxjerr nga kjo situatë nëpërmjet ndihmës së Allahut dhe punës së madhe. Futbolli më shpëtoi mua, falë Zotit”, shkruan futbollisti.
