Sulmuesi i kombëtares shqiptare Azdren Llullaku është duke kaluar një formë mjaft të mirë me skuadrën e Astras në Rumani. Në transfertën me Hermannstadt ai ka gjetur golin me anë të një 11-metërshi, të cilën trajneri ia besoi atij dhe sulmuesi nuk e zhgënjeu. Sulmuesi kuqezi nuk harron që pas çdo goli që shënon të festojë duke bërë shqiponjën me duar.
Në minutën e 74`, skuadra e Astras shënon dhe golin e dytë me anë të Erico. Deri në fund të takimit shifrat nuk ndryshojnë dhe Astra merr tre pikë të rëndësishme në ndeshjen e radhës në kampionat. Me këtë fitore skuadra ku bën pjesë sulmuesi i kombëtares shqiptare, Azdren Llullaku, ngjitet në vendin e tretë në renditje me 20 pikë, 3 më pak se Cluj që kryeson kampionatin.
Ndërkohë goli i realizuar sot nga penalltia, është i treti në kampionatin rumun për Azdren Llullakun, që duket se tashmë është rikthyer në formën e tij më të mirë. Sulmuesi është titullar i padiskutueshëm tek Astra dhe vijon të jetë protagonist për skuadrën rumune, që këtë sezon synon të fitojë kampionatin.
