Rritet numri i viktimave nga të shtënat masive që ndodhën fundjavën e kaluar në Kanada.
Policia bën me dije se janë shtuar edhe 4 viktima, duke e çuar në 23 numrin total të të vdekurve.
Edhe pse zyrtarët kishin deklaruar më herët se të gjithë personat e vrarë janë të rritur, në mesin e tyre është identifikuar edhe një 17-vjeçar.
Ngjarja u regjistrua në provincën Nova Skocia dhe sulmi ka zgjatur rreth 12 orë. Sipas REL, autori i dyshuar, i cili ishte i maskuar si polic, ka qëlluar disa njerëz në lokacione të ndryshme dhe më pas është vrarë nga policia.
Policia ka paralajmëruar qysh më herët se numri viktimave mund të rritet, pasi ajo ka qenë duke hetuar 16 skena të ndryshme të krimit. Autoritetet nuk e kanë përcaktuar ende motivin e krimit, por kanë thënë se sulmuesi i ka njohur disa nga viktimat.
Sipas mediave amerikane, ky sulm është më i rëndi në Kanada që nga viti 1989, kur një person vrau 15 gra në Montreal.
