Irani ka sulmuar me 22 raketa dy bazat ajrore ushtarake amerikane, ‘al-Asad’ dhe ‘Irbil’ në Irak. Nga ky sulm raportohet se kanë humbur jetën 80 persona. Duke iu referuar BBC, sulmin në fjalë e kanë marrë përsipër Garda Revolucionare Islamike e Iranit, e cila përmes një mesazhi në agjensinë shtetërore të lajmeve, IRNA, paralajmëron të tjera sulme.
Ministri i Jashtëm iranian, Javad Zarif, deklaroi se sulmi ishte vetëmbrojtje. Pas kësaj, një reagim i menjëhershëm është përcjellë nga ana e presidentit Donald Trump. Presidenti është shprehur se SHBA ka ushtrinë më të fuqishme në botë.
Me një postim në Twitter, ai ka thënë se gjithçka është mirë dhe se nesër në mëngjes do të mbajë një deklaratë për shtyp.
Trump gjithashtu i kujtoi kundërshtarëve të tij që Shtetet e Bashkuara të Amerikës kanë ushtrinë më të fortë në të gjithë botën.
Ndërsa zëdhënësi i Shtëpisë së Bardhë, Stephanie Grisham, në një deklaratë më mediat u shpreh: “Presidenti është informuar dhe po monitoron nga afër situatën dhe po këshillohet me ekipin e tij kombëtar të sigurisë”.
Kjo përplasje vjen pas vrasjes së gjeneralit iranian, Qasem Soleimanit në Bagdad, me urdhër të presidentit amerikan Donald Trump.
