Një sulm me dron i Pentagonit, ka vrarë ‘planifikuesin’ pas shpërthimit vetëvrasës të aeroportit të Kabulit, i cili la më shumë se 170 njerëz të vdekur.
Raketa goditi një luftëtar të ISIS-it, ndërsa ai ishte në makinën e tij me një tjetër bashkëpunëtor të shtetit islam në provincën Nangahar, Afganistanin lindor. Zyrtarët amerikanë thanë se sulmi u miratua nga Presidenti Joe Biden.
Hakmarrja erdhi më pak se 48 orë, pasi një bombë vetëvrasëse e pretenduar nga grupi vrau 13 ushtarë amerikanë. Zëdhënësi i Marinës Amerikane, William Urban, konfirmoi se ushtria “kreu një operacion antiterrorizëm mbi horizont, kundër një projektuesi të ISIS-K”.
“Indikacionet fillestare janë se ne e kemi vrarë objektivin. Ne nuk dimë për viktima civile”, shtoi ai. Sulmi erdhi pasi Ambasada Amerikane në Kabul lëshoi një paralajmërim tjetër të sigurisë dje, duke u thënë amerikanëve të largoheshin menjëherë nga vendi, për shkak të një sulmi tjetër të mundshëm në aeroport.
Britania dje filloi të tërheqë ushtarët dhe diplomatët e saj nga vendi.
Ministria e Mbrojtjes (MM) tha se aftësia e Mbretërisë së Bashkuar për të përpunuar më shumë evakuime civile nga vendi tani, do të jetë “jashtëzakonisht e ulët” – që do të thotë se deri në 1.250 njerëz, përfshirë deri në 150 shtetas britanikë, mund të lihen pas.
Nuk ishte e qartë nëse personi i vrarë ishte përfshirë veçanërisht në shpërthimin vetëvrasës të së enjtes, jashtë portave të aeroportit të Kabulit, ku turma afganësh po përpiqeshin dëshpërimisht të hynin si pjesë e evakuimit të vazhdueshëm nga vendi pas talebanëve.
Një dron i cili u ngrit nga Lindja e Mesme, goditi militantin që ishte në një makinë me një bashkëpunëtor të Shtetit Islamik. Të dy besohet se janë vrarë, tha një zyrtar.
Një banor i qytetit lindor të Jalalabad, kryeqyteti i provincës Nangarhar, tha se kishte dëgjuar disa shpërthime rreth mesnatës të së premtes.
“Sot ne kontrolluam dhe dëgjuam se ishte një sulm ajror që goditi një shtëpi civile”, tha Sayed Ekram, duke shtuar se ai nuk kishte informacion në lidhje me viktimat.
Nuk ishte e qartë nëse shpërthimet ishin shkaktuar nga një sulm me dron amerikan.
Një komandant i lartë taleban tha se disa anëtarë të ISIS-K, ishin arrestuar në lidhje me sulmin në Kabul. Ai tha: “Ata janë duke u marrë në pyetje nga ekipi ynë i inteligjencës”.
Më herët, të premten në mbrëmje, SHBA përsëri paralajmëroi qytetarët e saj që të largohen nga afërsia e aeroportit të Kabulit. “Qytetarët amerikanë që janë në portën Abbey, porta Lindore, porta Veriore ose porta e Ministrisë së Brendshme të Re, tani duhet të largohen menjëherë”, paralajmëroi Departamenti i Shtetit.
Një paralajmërim i ngjashëm u lëshua në orët e para të së enjtes, para fillimit të sulmit vetëvrasës.
Burimi i lajmit: Dailymail. Përshtatur nga Tirana Today
