Më 9 shtator, sistemet informatike të policisë shqiptare u bënë objekt i një sulmi të dytë kibernetik, pas atij të muajit korrik. Nga verifikimi i ekspertëve ka rezultuar se sulmi kibernetik ndaj sistemeve të policisë më 9 shtator nuk ishte i beftë. Në sajë të verifikimeve të eksperteve të njësisë C, ka rezultuar se virusi ka qenë në sistem që prej qershorit. Kjo do të thotë se hakerat kanë pasur kohë të mjaftueshme për të kopjuar gjithë të dhënat që kanë pasur këto sisteme. Ka dyshime se virusi është instaluar në system si back door pas klikimeve në ndonjë material të infektuar, e më pas është shpërndarë në të gjithë njësitë e tjera ku ka qëndruar i fjetur deri mbrëmjen e 9 shtatorit, ky dyshohet se është aktivizuar një virus i dytë që mbylli sistemin. Këto janë gjetjet nga verifikimet e deritanishme, por një raport i detajuar do të përpilohet dhe me ekspertë të huaj që pritet të vijnë në ndihmë për të ringritur sistemet e policisë, shkruan “Top Channel”.
Vendi ynë prej javësh u përball me sulmin kibernetik të sistemit TIMS, duke sjellë kaos në pikat kufitare të vendit. Prokuroria e Tiranës ka vendosur ndalimin e çdo të dhëne të botuar nga autorët e sulmit kibernetik, pasi ato hodhën në rrjet, në faqen “Homeland Justice”, shkëmbimet e postës elektronike të ish-drejtorit të Përgjithshëm të Policisë Gledis Nano, të cilat u rimorën më pas nga mediat. Njoftimin për urdhërin e Prokurorisë e bëri të ditur Drejtoria e Përgjithshme e Policisë. Qeveria shqiptare mori vendimin që të dëbonte diplomatët iranianë në Tiranë pas kësaj situate të krijuar, duke njoftuar prishjen e marrëdhënieve diplomatike me Iranin.
