Një javë nga tragjedia në Sri Lanka me 250 të vdekur autoritetet vendase janë hedhur në veprim dhe kanë rënë në gjurmët e grupit të terroristëve islamikë të dyshuar. Nga përplasja e armatosur me pjesëtarët e këtij grupi këtë mëngjes 15 persona kanë vdekur.
Përleshjet ndodhën në Sainthamaruthu, në jug të qytetit bregdetar të Batticaloa. Jo shumë larg vendit ku ndodhën sulmet kamikaze të së dielës së kaluar.
Forcat e sigurisë kanë kryer bastisje në të gjithë vendin pas shpërthimeve. Kisha Katolike në Sri Lanka ka anuluar të gjitha meshat e së dielës deri në një njoftim të dytë pas shpërthimeve të së dielës.
Kryepeshkopi i Colombo, Malcolm Ranjith tha se kishte parë një dokument sigurie që paralajmëronte sulme të mëtejshme. Ai gjithashtu tha se ishte ndjerë “i tradhtuar” pasi doli se qeveria kishte dështuar të vepronte për paralajmërimet e bombardimeve.
Autoritetet akuzojnë grupin Tawheed Jamath, edhe pse në të njëjtën kohë ISIS ka pranuar bombardimet. Përplasja ndodhi në lindje të Sri Lankës, në një zonë jo shumë larg radikalit Zahran Hashim, i cili dyshohet të jetë lideri i sulmeve të së dielës në kisha dhe hotele.
Deri tani Policia ka arrestuar rreth 80 persona si përgjegjës për vdekjen e 250 personave, ndërsa kryeministri i vendit deklaroi se shërbimet e inteligjencës kombëtare janë angazhuar maksimalisht në të gjithë vendin për të vendosur para përgjegjësisë të gjithë autorët.
Pritet të shihet se çfarë do të ndodhë këtë të diel pasi Kisha katolike e Sri Lankës ka bërë thirrje për tubime në të gjithë vendin, 1 javë pas tragjedisë.
