Një shtëpi botuese franceze ka publikuar një libër të titulluar “Historia e shpejtë e shekullit të 20-të”, ku thuhej se sulmet e 11 Shtatorit 2001 në SHBA mund të ishin orkestruar nga CIA.
Libri shkollor ishte publikuar në nëntor të vitit 2019 dhe përmbante shumë teori të tjera konspiracioni. Sipas mediave të huaja, kjo teori e cila gjendej në faqen 204 të librit u pikas nga bija e një mësueseje që e kishte blerë.
Shumë shpejt kjo faqe e librit u bë virale në rrjetet sociale. Mësohet se në faqen 204 të librit thuhet se:
“Kjo ngjarje globale – pa dyshim e orkestruar nga (shërbimet sekrete të) CIA për të imponuar influencën amerikane në Lindjen e Mesme – goditi simbolet e fuqisë amerikane në territorin e saj”.
Edhe pse në atë kohë grupi terrorist al-Kaeda, i drejtuar nga kreu i lig Osama Bin Laden, mori përgjegjësinë për sulmet, ekzistojnë akoma shumë teori konspirative se kjo ishte një “punë e brendshme”.
Shtëpia botuese ka kërkuar ndjesë në lidhje me këtë rast, teksa thotë se autori dëshiron ta heqë këtë pretendim. Kompania shtoi se një korrektim i kësaj vepre do të shtohet në versionet ‘online’.
“Kjo frazë që i bën jehonë teorive të konspiracionit pa baza faktuale nuk duhet të ishte përfshirë kurrë në punim”, thuhej në postimin e kompanisë.
