Studimi: Ja si gërhitja kronike gjatë gjumit e dëmton trurin e fëmijëve

Një gjumë i mirë është çelësi për mirërritjen e çdo fëmije. Ndërsa disa fëmijë mund të pushojnë mjaftueshëm, cilësia e gjumit të tyre është një çështje krejt tjetër. Studiuesit kanë zbuluar se fëmijët që gërhasin rregullisht, nuk vuajnë vetëm nga ndërprerja e gjumit, por ky problem mund të prekë edhe trurin e tyre.

Një ekip nga Universiteti i Merilendit kanë dalë në përfundimin se fëmijët që gërhasin shpesh kanë ndryshime strukturore në trurin e tyre. Këto ndryshime tregojnë një lidhje me problemet e sjelljes siç janë mungesa e vëmendjes, hiperaktiviteti dhe vështirësitë e të mësuarit në shkollë.

Autorët e studimit ekzaminuan skanimet MRI tek mbi 10.000 fëmijë mes moshave nëntë dhe 10 vjeç. Të gjithë këta fëmijë janë regjistruar në studimin e “Adoleshent Brain Cognitive Development” (ABCD), studimi më i madh afatgjatë i zhvillimit të trurit dhe shëndetit të fëmijëve në Amerikë. Për të ndihmuar studimin, prindërit e fëmijëve raportuan mbi zakonet e tyre të gërhitjes.

Rezultatet treguan se fëmijët që gërhisnin më shumë se tre herë në javë kishin më shumë gjasa të kishin lëndë gri më të hollë në rajone të shumta të lobeve ballore të trurit. Këto zona janë përgjegjëse për arsyetimin më të lartë dhe kontrollin e impulsivitetit. Autorët e studimit thonë se materia më e hollë e trurit në këto rajone gjithashtu lidhet me çështje të sjelljes në lidhje me frymëmarrjen e çrregullt përgjatë gjumit. Mjekët i referohen formës së rëndë të kësaj gjendje si apnea e gjumit.

Tek këta fëmijë, gërhitja mund të shkaktojë gjumë të trazuar gjatë gjithë natës për shkak të ndërprerjeve në frymëmarrjen e tyre. Kjo zvogëlon furnizimin me oksigjen në tru.“Ky është studimi më i madh i këtij lloji që detajon lidhjen midis gërhitjes dhe anomalive të trurit”,- shpjegon autori kryesor i studimit Amal Isaia, profesore e asociuar e Otorinolaringologjisë-Kirurgjisë së Kokës dhe Qafës dhe Pediatrisë në Universitetin e Merilendit. “Këto ndryshime të trurit janë të ngjashme me ato që do të shihni tek fëmijët që kanë mungesë të vëmendjes dhe çrregullime të hiperaktivitetit. Fëmijët kanë mungesë të kontrollit njohës që shoqërohet gjithashtu me sjellje kompulsive.”

Deri në 10 për qind e fëmijëve në SHBA mund të kenë probleme me frymëmarrjen e çrregullt përgjatë gjumit. Për fat të keq, studiuesit besojnë se mjekët mund t`i diagnostikojnë gabim shumë nga këto raste si ADHD (çrregullimi i deficitit të vëmendjes/hiperaktivitetit është një nga çrregullimet mendore më të zakonshme që prek fëmijët) dhe u përshkruajnë pacientëve ilaçe stimuluese.

“Nëse keni një fëmijë që gërhet më shumë se dy herë në javë, gjendja e këtij fëmije duhet të vlerësohet. Tani kemi prova të forta strukturore nga imazhet e trurit për të përforcuar rëndësinë e diagnostikimit dhe trajtimit të frymëmarrjes së çrregulluar të gjumit tek fëmijët”,- thotë dr.Isaia.

Autorët e studimit shtojnë se mënyra më e mirë për të trajtuar gjendjen është përdorimi i tonsilektomisë dhe adenoidektomisë. Këto janë metodat tipike për lehtësimin e gërhitjes, pauzave të frymëmarrjes dhe frymëmarrjes me gojë tek fëmijët.

“Ne e dimë që truri ka aftësinë për të riparuar vetveten, veçanërisht tek fëmijët, kështu që njohja dhe trajtimi në kohë i gjumit me çrregullime të frymëmarrjes mund t`i zbusë këto ndryshime të trurit. Nevojiten më shumë kërkime për të vërtetuar lidhjen mes gjumit të çrregullt dhe mungesës së vëmendjes dhe hiperaktivitetit, të cilat mund të çojnë në trajtime të mëtejshme”,- thotë bashkëautorja e studimit Linda Chang, MD, MS, një hetuese bashkë-kryesore në studimin ABCD.

Shkencëtarët po planifikojnë një tjetër studim për të parë nëse fëmijët që vazhdojnë të gërhasin do të shfaqin në skanimet e mëvonshme një gjendje më të përkeqësuar të trurit.“Për herë të parë, ne mund të shohim prova mbi imazhin e trurit që vlerësojnë nëse kjo gjendje e vazhdueshme mund të ndikojë në zhvillimin neurologjik të një fëmije”,- përfundon E.Albert Ris, zëvendëspresident për Çështjet Mjekësore në Universitetin e Baltimorës.

Burimi i lajmit: https://www.studyfinds.org/brain-changes-children-snore

Përshtatur nga TIRANA TODAY