Ne njerëzit, jemi një specie që na pëlqen shumë rrushi i fermentuar. Ne kemi prodhuar dhe pirë verë që nga viti 6000 Para Krishtit. Ndërkohë, 2.000 vjet më parë në çdo rrugë të qyteteve romake, kishte bare ku servirej verë. Në vitin 2014, vetëm amerikanët konsuamuan rreth 893 milionë litra verë. Një shifër e jashtëzakonshme.
Por a është diçka e mirë për shëndetin konsumi i shpeshtë i verës? Shkenca thotë se po, por në mënyrë të moderuar. Si fillim, çfarë quhet një konsum i moderuar? Një gotë standarde, është e barabartë me 14.0 gramë alkool të pastër. Sipas Guidës Dietike për Amerikanët, konsumi i moderuar i alkoolit, nënkupton pirjen e një gote në ditë për gratë, dhe deri në 2 gota për burrat.
Pjesa më e madhe e interesit shkencor mbi verën, ka të bëjë me antioksidantët. Të njohur si polifenole, dhe veçanërisht flavonoidet dhe resveratroli, këta antioksidantë besohet se punojnë në dobi të mbrojtjes së qelizave dhe indeve, dëmtimi i të cilave mund të shkaktojë sëmundje të ndryshme, si tumoret dhe sëmundjet e zemrës. Në mënyrë të veçantë, ato gjenden në shumicë tek vera e kuqe.
Mund të kufizojë aterosklerozën
Sipas Shoqatës Amerikane të Zemrës (AHA), një numër studimesh sugjerojnë se përbërjet polifenolike në verën e kuqe, mund të luajnë një rol aktiv në kufizimin e fillimit dhe përparimit të aterosklerozës, një sëmundje që shoqërohet me ndërtimin e pllakëzave brenda arterieve.
Rrit kolesterolin “e mirë”
Është vërtetuar se pirja e një ose 2 gotave verë në ditë, rrit me rreth 12 për qind kolesterolin HDL, raporton AHA. Ky kolesterol “i mirë”, mund të ndihmojë në pastrimin e kolesterolit të keq (LDL) nga sistemi, si dhe të zvogëlojë sasinë e materialeve, që mund të ndihmojnë në bllokimin e arterieve.
Zvogëlon rrezikun e sëmundjeve të zemrës
Kur Shoqata Amerikane e Zemrës, rishqyrtoi të dhënat e 51 studimeve epidemiologjike për këtë raport, dhe zbuloi se konsumi i deri 2 gotave verë në ditë, ul me gati 20% rrezikun e sëmundjes koronare të zemrës.
Ul rrezikun e sulmeve në zemër
Ndërkohë, në studimin e gjatë dhe gjithëpërfshirës, të njohur si Studimi i Profesionistëve Shëndetësorë, 38.077 profesionistë meshkujt, që nuk vuanin nga ndonjë sëmundje e zemrës, u vëzhguan gjatë 12 viteve. U vu re që ata që pinin deri në 2-3 gota verë në ditë, 3 deri në 4 herë në javë, ulej deri në 32 për qind rreziku i të pasurit një sulm në zemër.
Mund të zvogëlojë rrezikun e goditjes në tru
Shoqatës Amerikane të Zemrës, vëren ndërkohë se pirja e moderuar dhe deri në mesatare e verës, shoqërohet me një ulje prej 20 për qind të rrezikut për një goditje ishemike në tru, dhe ndoshta ndihmon në parandalimin e goditjeve të mëvonshme.
Është e mirë për zorrët
Një studim i botuar në “Gastroenterology”, ka zbuluar se njerëzit që pinë verë të kuqe, kanë një larmi më të madhe bakteresh që jetojnë në zorrët e tyre, sesa ata që pinë birrë, verë të bardhë apo pije të forta alkoolike. Një mikrobiomë e larmishme e zorrëve, është shenjë e një shëndetit të mirë të zorrëve. Studiuesit besojnë se kjo ndodh, për shkak të pranisë së shumë polifenoleve në verën e kuqe.
Ul stresin dhe ankthin
Një tjetër studim i botuar në revistën “Neuropharmacology”, zbuloi se një përbërës në verën e kuqe i quajtur resveratrol, mund të ofrojë mbrojtje nga simptomat e depresionit dhe ankthit. Përbërësit që gjenden në verën e kuqe, duket se bllokojnë çlirimin e një enzime, që ka lidhje me kontrollin e stresit në tru.
Redukton rreziqet e formimit të gurëve në tëmth dhe të diabetit
Një studim i botuar në “Diabetes Care”, zbuloi një rrezik të zvogëluar prej 30 për qind nga prekja e diabetit të Tipit 2, tek konsumatorët e moderuar të alkoolit. Një studim edhe me i zgjeruar, zbuloi se edhe më pak më pak se 1 gotë verë në ditë, 5 herë në javë, ulte me 36 për qind rrezikun e prekjes nga diabeti.
Kujdes, mund të kombinohet rrezikshëm me disa lloje ilaçesh, dhe rrit rrahjet e zemrës
Alkooli bashkëvepron ndërkohë në mënyra shpeshherë të rrezikshme me një numër barnash, përfshirë acetaminofenin, ilaçet kundër depresionit, antikonvulsantët, qetësuesit e ndryshëm etj. Ndërkohë alkooli bllokon thithjen e folatit, vitaminës së rëndësishme B, që veç të tjerash, ndihmon në ndërtimin e ADN-së, dhe është thelbësor për ndarjen e saktë të qelizave.
Alkooli aktivizon gjithashtu folatet në gjak dhe inde. Ka gjasa që ky ndërveprim, të rrisë rrezikun e prekjes nga kanceri. Ndërkaq konsumi i shpeshtë i sasive të vogla të alkoolit, mund të rrisë rrezikun e pasjes së një fibrilacioni atrial, ose rrahjeve jo normale të zemrës.
Studiuesit në Kore, shqyrtuan të dhënat e më shumë se 9.7 milionë pacientëve, për të parë se sa prej tyre kishin probleme me rrahjet e zemrës. Ata zbuluan se njerëzit që pinin çdo ditë, kishin një rrezik më të madh, krahasuar me ata që pinin alkool një herë ose dy herë në javë.
Çelësi është moderimi
Shkolla Mjekësore e Harvardit në SHBA, thekson se alkooli është edhe njëherazi një tonik dhe një helm. “Dallimi qëndron kryesisht tek doza. Pirja e moderuar, duket se i bën mirë zemrës dhe sistemit të qarkullimit të gjakut, dhe ndoshta e mbron njeriun nga diabeti i Tipit 2, dhe gurët në tëmth.
Ndërkohë konsumi në sasi të mëdha, është shkaku kryesor i vdekjes së parandalueshme në shumicën e vendeve. Në SHBA, alkooli është përgjegjës për rreth gjysmën e aksidenteve rrugore fatale. Të gjithë kemi histori unike personale dhe familjare, ndaj tek e fundit një gotë verë i ofron secilit prej nesh një varg përfitimesh, por edhe rreziqesh të ndryshme. Pirja apo jo e verës, kërkon balancimin e kujdesshëm të këtyre përfitimeve dhe rreziqeve./ TIRANA TODAY
