Studentët e Vlorës kanë braktisur qytetin bregdetar, duke bërë që 3 degë në universitetin “Ismail Qemali” të rrezikojnë mbylljen.
Degët Kimi, Matematikë dhe Fizikë rrezikojnë që me nisjen e vitit të ri shkollor, të mos çelen.
Kjo pasi në Fakultetin e Shkencave Ekzakte deri tani nuk ka pasur asnjë kërkesë për regjistrim.
Kur ka mbetur dhe një fazë regjistrimi, në këto degë nuk ka pasur preferenca, çka do të thotë se do të vijohet vetëm në vitin e dytë dhe të tretë të tyre.
Nga ana tjetër, thuhet se regjistrimet në Universitetin “Ismail Qemali” për raundin e tretë do të vijojnë deri në datë 19 tetor, çka do të thotë se ka ende shpresë. Por referuar interesimit të deritanishëm, në degët Kimi, Matematikë dhe Fizikë nuk do të ketë asnjë student për këtë vit akademik, raporton Panorama.
Për çeljen e një dege, duhen të paktën 10 studentë të regjistruar, por referuar interesimit që kanë treguar deri më tani maturantët, shpresa për çeljen në vitin e parë të këtyre degëve duken minimale.
Edhe vitin e kaluar, këto tri degë kanë pasur shumë pak kërkesa. Tashmë, këtë vit, këto degë në vitin e tyre të parë nuk do të çelen.
Lajmin e ka konfirmuar dhe rektori Roland Zisi, edhe pse ai shpreson në raundin e tretë të regjistrimeve, i cili mbyllet në datë 19 tetor. Pjesa më e mirë e studentëve kërkojnë të regjistrohen në Universitetin e Tiranës, teksa preferencë të tyre të parë kanë një nga degët në këtë universitet, ndërsa Vlora mbetet zgjedhje e dytë e tyre.
Universiteti i Vlorës këtë vit ka pasur nga 10 deri në 20% më pak të regjistruar në shumë prej degëve të tij.
