Kryeministri i Kosovës, Albin Kurti, në një konferencë për mediat ka zbuluar se prej një muaji janë zhvilluar bisedime me SHBA-në, për strehimin e refugjatëve nga Afganistani në Kosovë. Kurti nënvizoi ndër të tjera se Kosova e ka SHBA-në aleatin kryesor dhe partnerin strategjik të pazëvendësueshëm. Ndaj, çështja e strehimit të refugjatëve përveç aspektit humanitar, e ka edhe dimensionin nga partneriteti me SHBA-në.
“Qytetarët kudo në botë jo vetëm që e meritojnë, por edhe iu takon demokracia, liritë dhe të drejtat, dhe ne shpresojmë dhe urojmë më të mirën për qytetarët e Afganistanit. Në anën tjetër, ka një muaj që Qeveria e Kosovës është në kontakt me SHBA-në, për të përgatitur në aspektin organizativ, strehimin dhe mbrojtjen e një numri refugjatëve të Afganistanit.
Ne jemi shtet serioz, këtë punë e kemi bërë pa zhurmë dhe më shumë suksese, pasi çështja e tyre është e dhimbshme dhe ndjeshme e sigurisë”, deklaroi Kurti.
Kryeministri tha se është ministri i Punëve të Brendshme dhe shefi i stafit në Kryeministri, në krye të ekipit që po bëjnë bisedime me aleatët e SHBA-së. “Ne e kemi SHBA-në aleatin kryesor dhe partnerin strategjik të pazëvendësueshëm, dhe çështja e strehimit të refugjatëve përveç aspektit humanist nga ana jonë, e ka edhe dimensionin nga partneriteti me SHBA-të. SHBA na kanë mbështetur në vazhdimësi dhe kjo është vetëm një pjesë e kontributit tonë përkundër ndihmës së tyre të madhe për popullin tonë”.
Kurti bëri të ditur se hollësitë për refugjatët janë duke u diskutuar me SHBA-në, dhe se kur ata të kenë njoftimet konkrete për numrin e tyre, do të bëjnë publike të dhënat edhe në Kosovë.
Shtetet e Bashkuara dhe më shumë se 60 vendet të tjera nxorën një deklaratë në orët e vona të së dielës, ku u bëjnë thirrje të gjitha palëve në Afganistan “të respektojnë dhe ndihmojnë” largimin e rregullt të afganëve dhe shtetasve të huaj që duan të ikin nga Afganistani.
“Ata që janë në pozita pushteti e autoriteti në mbarë Afganistanin, mbajnë përgjegjësinë dhe duhet të përgjigjen për mbrojtjen e jetëve dhe të pronave si dhe për rikthimin e menjëhershëm të sigurisë dhe rendit civil. Afganët dhe shtetasit e huaj që duan të largohen, duhet të lejohen të largohen. Rrugët, aeroportet dhe pikat e kalimit kufitar duhet të mbeten të hapur dhe të ruhet qetësia”, thuhet në deklaratë.
Për herë të parë dje ka reaguar edhe presidenti amerikan Joe Biden. Gjatë një deklarate për mediat, ai u shpreh se SHBA-ja shpenzoi shumë para dhe qëllimi nuk ishte që të ndërtonte shtetin afgan, por të luftonte terrorizmin. /Tirana Today
