Ish-deputeti Gent Strazimiri, ka thënë në studion e lajmeve në RTV Ora, se PD është duke u përgatitur për zgjedhje të parakohshme. Ai zbuloi ndër të tjera se opozita është në fazën e riorganizimit dhe të forcimit, për të përmbyllur një proces organizativ në struktura. Strazimiri u shpreh se qëllimi madhor është për të shpëtuar vendin nga kriza.
Çfarë ndodh në PD. Po përgatitet PD për zgjedhje të parakohshme?
“PD dhe opozita po përgatiten për zgjedhje. Jemi në fazën e riorganizimit dhe të forcimit për të përmbyllur një proces organizativ në struktura. Qëllimi është të shpëtojmë vendin duke e nxjerrë nga kriza. Të shpëtojmë nga kjo qeveri e kapur disa herë në krim. Kjo qeveri që ka gjymtuar parlamentin, dhe na ka kthyer në një shtet monopartiak të skandaleve, të varfërisë dhe mosfunksionimit të ligjit”.
Strazimiri tha se kjo nuk zgjidhet vetëm nga opozita, por gjithë shoqëria. “Nuk është një situatë që zgjidhet vetëm nga opozita. Opozita është një dimension politik i kësaj shoqërie. Jo gjithçka zgjidhet politikisht. Duhet ta zgjidhim njëherë qytetarisht, të ngrihemi ti themi njëherë jo këtij, pastaj të zgjedhim kush do të na drejtojë”.
Ai iu rikthye marrëveshjes së Bashës me Ramën, ndërsa nuk nguroi që të paralajmëronte kryedemokratin. Sipas tij, marrëveshja me Ramën dënohet nga kodi penal, dhe se është bashkëpunim në krim.
“Marrëveshja me Edi Ramën dënohet nga kodi penal, është bashkëpunim në krim. Unë nuk do ta bëja, dhe nuk do t’ja këshilloja as Lulzim Bashës. Një marrëveshje mes të gjitha partive politike, kjo është e mundshme dhe mund ta zgjidhte situatën”.
