Të dielën Partizani do të udhëtojë drejt Gjirokastrës për tu përballur me Luftëtarin në ndeshjen e vlefshme për kategorinë Superiore. Trajneri i të kuqve, Sulejman Starova ka dalë në konferencën për shtyp para ndeshjes dhe ka prekur disa tema të ndryshme sa i përket kësaj sfide dhe atmosferës tek Partizani. Ai ka dhënë vlerësimin maksimal për mikun e tij që drejton gjirokastritët, Hasan Likën dhe ka vlerësuar lojën e bukur që po përcjell Luftëtari.
“Hasan Likën e kam mik të ngushtë. Ai ka ndryshuar fytyrën e Luftëtarit si me shkop magjik. Luftëtari i ka bërë të gjithë ndeshjet e mira, mund të merrte më shumë pikë. Për rrjedhojë kanë filluar të evidentohen edhe lojtarët cilësorë që ka kjo skuadër. Fakti tregoi që me Kamzën, skuadrën më të mirë të momentin, jo vetëm e fitoi ndeshjen, por e dominoi edhe me lojë. Të dyja skuadrat luftojnë për fitoren, le të fitojë më i miri.”
Problemi më i madh i Partizanit këtë sezon ka qenë sulmi, pasi Sukaj nuk ka qenë në formën më të mirë dhe lojtarët e rinj që soli trajneri italian Mark Iuliano rezultuan dështime. Por jo vetëm kaq, Straova më në fund ka pranuar se blerja më e shtrenjtë e ekipit, sulmuesi Edgar Çani ka rezultuar një nga dështimet më të mëdha të sezonit.
“Për Sukajn unë e di që ka marrë leje. Përveç Kalarit, grupi që luajti është i plotë. A pritet të luajë Çani? Nuk ka asnjë shans. Nuk ka gjendje shëndetësore dhe kjo është një vonesë e pashpjegueshme. Koha e rikuperimet është larg. Partizani nuk varet nga një person i vetëm. Individi është në funksion të kolektivit. Fakti që nuk është aktivizuar, quhet një dështim nga ana jonë. Lojtari, ku u investua më shumë, nuk rezultoi i tillë.”
Po ashtu Partizani vazhdon luftën për të marrë atë titull të dy viteve më parë, që iu hoq Skënderbeut pas dënimit nga UEFA. Këtë herë zërin e ka ngritur Starova dhe është shprehur i bindur se ata do ta marrin atë titull ose duhet ta fshijnë atë vit kalendarik nga historia.
“Ai titull nuk ka ku të shkojë, se është yni, për faktin se skuadra Skënderbeut e ka marrë dënimin dhe Ilir Shulku thotë që nuk është UEFA që e jep. UEFA ka dhënë një dënim, Federata ka dhënë një dënim tjetër të formës së prerë. Në qoftë se duan ta lënë kampionatin pa fitues, fshijnë një pjesë të historisë. Automatikisht jemi ne skuadra që e meritojmë atë titullin.”
