Kryeministri Rama ka zgjedhur pikërisht ditën kur ishte për vizitë në Paris, i ftuar nga presindeti Macron, për t’i dhënë dritën jeshille arritjes në vend edhe të vaksinave ruse, të cilat ai në momentin e parë i kishte konsideruar “provokim i Ambasadës Ruse”. Dhuratën e princit të Kurorës së Emirateve të Bashkuara, Muhammed Bin Zayed, me 10 mijë doza Sputnik V e kanë pritur në Rinas ministrat Ogerta Manastirliu dhe Arben Ahmetaj.
Nga Qeveria nuk pati asnjë sqarim lidhur me arsyet se përse u refuzua vaksina kur Ambasado Ruse kërkoi nisjen e negociatave për këtë vaksinë edhe me Shqipërinë. Ambasada Ruse në Tiranë i shkroi Drejtorit të Komunikimit, z. Endri Fuga, lidhur me këtë ofertë, një kërkesë që u konsiderua nga kryeministri Rama “meme”. Madjez. Rama kërkoi nga Ambasada të tërhiqej me ndjesë nga kjo kërkesë për negociatat për Sputnik V. “…Për një shtet serioz është krejtësisht e papërshtatshme që të bëjë provokime të tilla dhe kur them provokim nuk po i paraprij ndonjë demarshi pranë shtetit rus, sepse ky është provokim qesharak dhe nuk është mirë që një vend serioz si Rusia të bëhet qesharake përmes këtyre lloj postimeve dhe një ambasadë si ajo ruse, që është një ambasadë e rëndësishme të sillet sikur është një seksion i Portokallisë, apo një konkurrent i Portokallisë. Shpreh keqardhje për këtë sepse nuk shoh arsye që ambasada e Rusisë të përfshihet në prodhimin e memeve”, u shpreh Rama.
Nga Ambasada Ruse pati reagim nga komenteve të kryeministrit Rama. “Na vjen keq që vullneti i mirë i Rusisë, i shprehur publikisht, interpretohet si veprim provokuese. Është e vështirë të kuptohet pse Kryeministri i nderuar i Shqipërisë z. Edi Rama u mërzit kaq shumë nga komenti i Ambasadës së Rusisë në faqen e saj në Facebook, më 28 dhjetor të këtij viti. Në komentin e Ambasadës bëhej fjalë për gatishmërinë e institucionit rus të autorizuar – Fondit të Investimeve Direkte – për të shqyrtuar aplikimet nga çdo vend i interesuar për blerjen e vaksinës ruse kundër koronavirusit, përfshirë Shqipërinë. Në Rusi nuk ka dyshime se bashkimi i përpjekjeve të të gjitha shteteve, që kanë kryer kërkime shkencore dhe kanë teknologjitë përkatëse, do të ndihmojë njerëzimin të kapërcejë këtë fatkeqësi dhe të kthejë qytetërimin në rrugën e zhvillimit të qëndrueshëm. Në të njëjtën kohë, Moska nuk u vë asnjë kusht partnerëve potencialë”, thuhej në reagimin e ambasadës ruse.
Tashmë që në Shqipëri mbërritën 10 mijë vaksinat e para ruse, nuk dihet se çfarë ndodhi që z. Rama ndryshoi mendim për këtë vaksinë, pa asnjë sqarim as nga ai e as nga Komiteti i Ekspertëve.
