Kryeministri Edi Rama ka reaguar sot lidhur me incidentin në uzinën e armëve në Gramsh dhe arrestimin e tre personave për spiunazh. Rama e cilësoi si qesharake teksa i kanë etiketuar si spiunazh, ku sipas tij, po fotografonin ‘mbetjet arkeologjike’. Kryeministri tha se ajo çfarë duhet që të na shqetësonte është se çfarë qëllimesh kanë këta persona, dhe se i takon hetimit për të nxjerrë përfundimet.
“Nuk kam pasur mundësi të shprehem për këtë, edhe pse Ministri i Mbrojtjes, me Ministrin e Brendshëm bënë shpjegimin e nevojshëm. Por më lejoni t’ju them se mjegulla e ngritur mbi të ashtuquajturat objekte të rëndësisë së veçantë, ishte për të qarë dhe për të qeshur.
Ato nuk janë objekte të rëndësisë të veçante. Ato nuk janë fabrika që prodhojnë armë, por karakatina të deklasifikuara si objekte të rëndësisë së veçantë në 2012-ën dhe faktikisht kanë statuset e SHPK-ve që janë të falimentuara, dhe që janë deri në pikën kur për shkak se kanë disa roje aty për të mbrojtur atë perimetër nga zbatimet etj.
Të thuash që bëhet spiunazh duke fotografuar ato mbetje arkeologjike të komunikimit, qesharake. Ajo që duhet të na shqetësonte është se çfarë qëllimesh kanë këta persona. Por një mision spiunazhi që shfaqet me një veturë sportive që duket; aman hajde më kapni, është qesharake. I takon hetimit të nxjerrë më shumë. Shqetësimi ynë është se ku është qëllimi i vërtetë”, tha ai.
Dy rusët dhe ukrainasi po fotografonin ambientet në uzinën e armëve, teksa kanë tentuar që të futen brenda, janë pikasur nga ushtarët shqiptarë të cilët u kanë bërë me shenjë që të ndalojnë më 20 gusht. Ato nuk u janë bindur urdhrave të ushtarëve shqiptarë, ndërsa njëri prej tyre Mikhail Zori, i ka sulmuar me spraj kimik, konkretisht Albi Bicin dhe Ardian Xhakën. Megjithatë ushtarët shqiptarë bënë të mundur ndalimin e tij, ndërsa dy të tjerët Svetlana Timofeeva dhe ukrainasi Fedis Alpatov, u arrestuan pak minuta më vonë nga policia. Uzina e Gramshit, e ndërtuar në vitin 1962, ka prodhuar në të kaluarën armë.
