Shtatë persona, nga të cilët katër pacientë dhe 3 sanitare të spitalit të Durrësit, janë diagnostikuar me tuberkuloz. Të prekurit me sëmundjen po trajtohen në spitalin universitar “Shefqet Ndroqi” në Tiranë.
Mjekja e këtij spitali, Donika Mema, tha sot për Report TV, se nuk bëhet fjalë për një situatë alarmante, por apeloi për kujdes të veçantë, sidomos në ambientet spitalore.
Ajo këshilloi shmangien e kontakteve të afërta me të sëmurët, zbatimin i rregullave të higjienës, bërjen e testeve të mikrobit nga stafet spitalore, etj.
Ajo gjithashtu bëri të ditur se gjatë një viti paraqiten rreth 400 raste me tuberkuloz dhe se rastet konstatohen kryesisht në Shqipërinë e veriut dhe atë qendrore.
Shenjat e sëmundjes, sipas mjekes, janë si të çdo sëmundjeje tjetër pulmonare dhe diferenca e vetme është, mos efektiviteti i antibiotikut tek të prekurit me tuberkuloz ndryshe nga të sëmurët e tjerë.
