Pas mbledhjes së Kryesisë së PS-së, Ministrja e Shtetit për marrëdhëniet me Parlamentin, Elisa Spiropali, tha në një prononcim për mediat se fokusi ka qenë tek zgjedhjet. Ajo u shpreh se janë të vendosur për ta çuar Shqipërinë para, pranë standarteve europiane.
Duke iu referuar PD, ku sipas saj ka lënë përkrahësit në rrugë, Spiropali shtoi se nuk do të marrin pjesë në “luftë”, por në zgjedhje.
Ministrja deklaroi pas përfundimit të mbledhjes së Kryesisë së Partisë Socialiste, se nuk do shkohet në zgjedhje pa opozitën.
“Disa parti kanë vendosur të dalin nga sistemi politik. Ne kemi diskutuar për zgjedhjet e 30 qershorit, sepse jemi të vendosur të garantojmë një proces zgjedhor me shqiptarët dhe për shqiptarët. Ne nuk do shkojmë në zgjedhje pa opozitën. Ato janë disa parti politike që kanë zgjedhur të mos marrin pjesë në zgjedhje. Atë vendim e kanë marrë prej frikës. Ne mendojmë se shqiptarët duhet të kenë zgjedhje. Ne nuk jemi këtu për të negociuar. Ne jemi një forcë politike që i përgjigjemi kërkesës për t’u zgjedhur. Ne nuk do marrim pjesë në luftë, por në zgjedhje.
Asnjë forcë politike nuk e ka lënë mendja t’i heqë shqiptarëve të drejtën për të votuar. Është një turp që PD ka zgjedhur që t’i lërë në rrugë zgjedhësit e saj. Është hera e parë që një parti nuk hyn në zgjedhje dhe këtë e konsideron fitore.
Ne jemi duke punuar. Sot fillon puna për organizimin në territor. Afati i fundit është 13 Maj. Ne do të bëjmë zgjedhjet më të mira për shqiptarët. Jemi të vendosur ta çojmë Shqipërisë përpara. Ne do hyjmë në zgjedhje dhe gjithçka tjetër varet nga oferta jonë për qytetarët”, u shpreh Spiropali.
