Ministrja për Marrëdhëniet me Parlamentin, njëherësh zëdhënësja e Qeverisë Elisa Spiropali ditën e sotme ka publikuar një foto ku shfaqet me shkrimtarin e njohur Ismail Kadarenë dhe bashkëshorten e tij, Helenën. “Me një Gjeni dhe një Zonjë të kësaj lartësie asnjë mundim nuk është i kotë, asnjë lodhje nuk është e tepërt, asnjë shpresë nuk është e parealizueshme për një Shqipëri evropiane, të begatë dhe të qytetëruar”, shkruan Spiropali krah fotos së publikuar në Instagram.
https://www.instagram.com/p/Bz8R5sLATXZ/
Lidhur me postimin e Spiropalit ka reaguar ish-deputeti i LSI-së, aktualisht zv.kryetari i kësaj force politike, Luan Rama. Ky i fundit ka pohuar se ka një këshillë për Spiropalin dhe i është drejtuar përmes një komenti në Instagram me këto fjalë: “Një këshillë për ty Elisë. Jo vetëm në kuptimin etik, por as në atë njerëzor, nuk mund t’u drejtohesh dy njerëzve të shquar, shkrimtarit tonë të madh Ismail Kadare dhe bashkëshortes së tij, shkrimtares Elena Kadare, me përemrat dëftorë “ky” dhe “kjo”!
Është mungesë respekti, është fyese. Është shenjë arrogance dhe mungesë e kulturës gjuhësore. Sepse Ismail dhe Elena Kadare nuk janë “ky” dhe “kjo” për askënd. Askush më parë dhe askund ku është folur dhe shkruar për Ismail Kadarenë dhe bashkëshorten e tij Elenë, nuk ka guxuar që t’u drejtohet me “ky” dhe “kjo”. Edhe nëse je nisur nga dëshira për të dëshmuar konfidencë, siç ka më shumë gjasë të jetë, nuk janë përemrat dëftorë që e mundësojnë këtë.
Gjuha shqipe ka plot fjalë të tjera që mund të përdoren në kësi rastesh. Ju jeni vajzë e shkolluar dhe duhet ta keni mësuar që herët se sa e rëndësishme është etika e komunikimit me të tjerët, sidomos me më të mëdhenjtë. Edhe fakti që jeni ministre nuk jua lejon këtë cenim të etikës, përkundrazi ju detyron më shumë. Sepse në fakt dëshmon për më shumë se sa vetëm mungesë etike. Shpresoj ta mirëkuptoni këtë këshillë miqësore. Faleminderit”.
