Liverpool dhe Manchester City vazhdojnë me fitore duke udhëhequr Premier League, ndërsa Manchester United është ndalur në barazim me Crystal Palace. Skuadra që drejtohet nga Jurgen Klopp luajti transfertën delikate përballë Ëatfordit, por rezultatin arriti ta zhbllokojë vetëm në pjesën e dytë të takimit, me autorët e golave Salah, Arnold dhe Firmino.
Egjiptiani mori një top në zonë nga e majta në minutën e 66’ dhe përballë portës goditi saktë dhe vetëm pas dhjetë minutash lojë, pas një goditje standarde, Trent Alexander-Arnold tundi fort portën duke shënuar një supergol.
Ndërsa për të tretin mendoi braziliani Firmino në minutën e fundit të takimit. Ai përfitoi nga një top i ardhur në zonë duke e çuar me kokë në katërkëndëshin e portierit Foster. Me këto tre pikë të radhës skuadra e kuqe grumbullon plot 33 pikë, dy më pak se City që ruan kreun.
Edhe kampionët e Anglisë nuk kanë zhgënjyer këtë javë pasi kanë shkatërruar me 4 gola West Ham-in e vendit të 13-të. Serinë e golave e hapi sulmuesi spanjoll, Silva në minutën e 11’, Sterling në minutën e 19’, Sane 34’ dhe në fund të takimit ishte përsëri gjermani Sane që hipotekoi fitoren.
Ndërsa, Manchester United ka zhvilluar një tjetër ndeshje për t’u harruar në “Old Trafford”. Skuadra e Jose Mourinho-s ka barazuar 0-0 brenda në shtëpi dhe vazhdon të mos bindë në Premier League. Mundësitë më të mira për të shënuar i ka pasur Crystal Palace, por edhe ekipi i Hodgson nuk është treguar i saktë. Një pikë e merituar për miqtë, ndërsa United vazhdon të ketë të njëjtat probleme në sulm.
