Nënkryetari i Partisë Demokratike, Edmond Spaho ka kundërshtuar vendimin e gjykatës për 50 protestuesit që u arrestuan në protestën e 11 majit, ku 20 prej të cilëve është dhënë masa “arrest me burg”.
Në një deklaratë për mediet, Spaho shprehet se vendimi është urdhër politik, ndërsa shtoi se nuk pritej gjë tjetër për aq kohë sa gjyqtari është nipi i Shefqet Peçit dhe i ati i nënkryetarit të FRESH-it.
“Damian Gjiknuri, hajduti i zgjedhjeve dhe që çoi për rrush e kumbulla 40 milion euro të buxhetit publik, ngarkohet të kryej reformën zgjedhore, kurse këta që protestojnë për të drejtat e liritë, futen në burg.
Vendimi i sotëm pritej për sa kohë që gjyqtar është nipi i Shefqet Peçit dhe i ati i nënkryetarit të FRESH-it.
Po e ndjekim me vëmendje dhe po i mbajmë shënim të gjitha rastet që po shkelin ligjin dhe do japin llogari në pushtetin e ardhshëm të PD-së”, tha Spaho.
Po ashtu, nënkryetari i PD ka premtuar se të gjithë protestuesit e opozitës që janë dënuar me burg, me ardhjen e demokratëve në pushtet do dëmshpërblehen financiarisht si të dënuar politik.
