Seanca e sotme plenare ka nisur me tensione. Deputeti i grupit të Rithemelimit, Edmond Spaho ka kërkuar ndryshimin e rendit të ditës. Sipas tij, seanca e sotme plenare duhet të nisë me interpelancën e kërkuar nga grupimi i Rithemelimit dhe jo me mocionin e debatit të kërkuar nga grupi parlamentar i PD-së.
PJESË NGA DEBATI:
Spaho: Dy çështje kam, së pari dje ndërroi jetë Madeleine, është në nderin tonë të mbajmë një minutë heshtje.
Felaj: Në orën 12:00, të mbajmë një minutë heshtje.
Spaho: Rendi i ditës, kemi kërkuar interpelancë me Ramën, nuk u përfshi në ditën e enjte, por është përfshirë sot. Është shkelur rregullorja në radhitje, po iu citoj nenin 97, duhet të nisë interperlanca, jo debati.
Spaho çohet nga vendi dhe shkon në Foltore për të folur me Felajn: Respekto rregulloren.
Felaj: Jeni pa mikrofon, nuk e kuptoj nervozizmin tuaj..
Balla: E kuptoj që keni të gjithë nga pak Sali nga brenda dhe merrni kot. Keni gjithë eksperiencën e duhur parlamentare, sot seanca përbëhet nga dy pjesë. Janë dy çështje që janë pjesë e rregullit të ditës. Se ty të ka hyrë Saliu brenda, të ka hyrë, por mbajë poshtë, mos u ngri aty.
Mocionet me debat janë seancë e posaçme, opozita e kërkoi ashtu. Kemi vendosur që në orën 10 të nisë me pikë të parë për një çështje dhe më pas do të vijojë normalisht. Kjo është traditë, por ju keni kërkesë për ndryshimin e rendit të ditës. Siguroni 2/3 e votave në sallë.
Nëntë pika janë renditur në rendin e ditës, që fillojnë me mocionin për zhvillimin e debatit në lidhje me rritjen e çmimeve, dhe marrjen e masave të menjëhershme të kërkuar nga Enkelejd Alibeaj në emër të grupit parlamentar të PD-së. Po ashtu është kërkuar në interperlancë kryeministri Edi Rama dhe ministrja Belinda Balluku. Pyetje do t’i bëhen Ministrit të Brendshëm Bledi Çuçi nga Nënkryetari i LSI, Petrit Vasili. Rama nuk do të jetë i pranishëm për shkak të samitit të NATO-së, ndërkohë që edhe ish-kryetari i Partisë Demokratike, Lulzim Basha mungon.
