Deputeti i Partisë Demokratike, Edmond Spaho, ka patur kritika sot ndaj Ministres së Financave, Delina Ibrahimaj. Qëndrimi kritik ishte ndaj fjalimit të ministres për aktin normativ të kompensimit të kompanive të ndërtimit. Sipas tij, ministrja ka katër muaj që lexon të njëjtin fjalim në Kuvend.
“Nuk është normale që Ministrja e Financave vjen me të njëjtin fjalim që ka mbajtur për Butrintin, dhe luftën në Ukrainë. Vjen tani dhe shpjegon edhe aktin normativ.
Të vijnë e të na thonë pesë gjëra që ka të bëjë me aktin normativ. Të ngelemi në debatin për çështjen, dhe jo të dëgjojmë të njëjtat histori nga kjo zonjë”, tha Spaho.
Në Kuvend pritet të miratohet akti normativ për kompensimin e çmimeve të materialeve të ndërtimit. Nëpërmjet këtij akti qeveria kompenson ndërtuesit e kontratave publike nga 5-30% për çmimin e rritur të hekurit, çimentos, bitumit, tubave plastike, aluminit, bakrit dhe zinkut. Por opozita ka kundërshtuar kompensimin e çmimeve.
