Presidenti Meta ka zgjedhur të mos marrë pjesë fizikisht në gjyqin që po zhvillohet ndaj tij, duke ia lënë në dorë mbrojtjen juristëve. Sot me nisjen e seancës, përfaqësuesi i presidentit Bledar Dervishaj, tha se ka sjellë për trupin gjykues prova dhe fakte të reja.
Këshilltari i presidentit Bledar Dervishaj ka kërkuar që të përdorë laptopin që kishte marrë vetë, për të paraqitur provat.
“Kemi nevojë të shfaqim fakte para Gjykatës”, ka thënë përfaqësuesi ligjor i Metës, Bledar Dervishaj.
“Ka shkelje në procedurat e Kuvendit për shkarkimin”, është shprehur Dervishaj.
Dervishaj: Kam marrë laptopin e punës dhe do më ndihmonte për të shpjeguar.
Tusha: Mund t’iu vëmë në dispozicion laptopin e gjykatës në funksion të procesit.
Dervishaj: I kemi materialet edhe në flash dhe do përdorim laptopin e gjykatës që është i certifikuar.
Bushka: Duam të kuptojmë se për çfarë është kjo kërkesë, ka të bëjë me përgjigjet e pyetjeve, apo diçka tjetër?!
I pyetur nëse presidenti e ka respektuar rolin e tij për të qenë mbi palët, këshilltari i Metës tha në Kushtetuese se gjatë gjithë mandatit presidenti e ka luajtur këtë rol. Por sipas tij Meta është sulmuar shpesh ndaj Edi Rama, dhe për këtë dorëzoi një video.
“Përgjatë gjithë legjislaturës e kemi respektuar këtë. Për të krijuar një klimë bashkëpunuese, bëmë edhe dy mbledhje të Këshillit të Sigurisë Kombëtare. Realizuam një platformë bashkëpunimi, dorëzuar nga Rama përmes ambasadores së SHBA, edhe liderit të opozitës Basha iu dorëzua por askush prej palëve nuk shfaqën asnjë angazhim”, tha Dervishaj.
Ndërkohë që përfaqësuesja e Kuvendit, në lidhje me filmimet nga fjalimet e Ramës, tha se kryeministri është përfaqësues politik ndërsa presidentit nuk i tolerohen të tilla sjellje.
“Ai është subjekt politik. Në zgjedhje ai përdor strategjinë të tij, qofshin të drejta apo të padrejta. Këto i vlerëson publiku. Nuk është në rolin e presidentit të sillet si përfaqësuesit e partive politike”.
