Kryeministri i Kosovës, Albin Kurti dhe Presidenti i Serbisë, Aleksandar Vuçiç do të takohen sot në Bruksel. Takimi mes Kurtit dhe Vuçiç pritet të nisë rreth orës 10:30 dhe ka si qëllim arritjen e një marrëveshje për normalizimin e marrëdhënieve mes dy shteteve.
Ky takim do të ndërmjetësohet nga Përfaqësuesi i Lartë i Bashkimit Europian, Joseph Borrell dhe i dërguari i posaçëm Miroslav Lajçak. Përpos takimit kokë më kokë, Borrell do të zhvillojë edhe takime të ndara me Albin Kurtin dhe Aleksandar Vuçiç.
Kujtojmë këtu se tensionet u krijuan pasi serbët lokalë vendosën barrikada si shenjë pakënaqësie ndaj vendimit të Qeverisë së Kosovës, për zbatim të dy vendimeve: për targat e makinave dhe dokumentet serbe. SHBA dhe BE kanë kërkuar po ashtu një shtyrje të tillë, ndonëse kanë thënë se Kosova ka të drejtë të zbatojë këto vendime.
