Gjatë ditës së sotme pritet të bëhet zëvendësimi i Valdrin Pjetrit, si kreu politik për Qarkun e Shkodrës, pas dorëheqjes së tij nga posti i kryebashkiakut.
Në mbledhjen që do zhvillojë PS sot, mësohet se fokusi do jetë në zgjidhjen e ngërçit në Shkodër. Sipas Top Channel, Partia Socialiste raporton për 4 emra potencialë për të zëvendësuar Pjetrin.
Ata janë: ish-zv.kryeminsitrja Senida Mesi, Megi Ajtyresa që vjen si propozim i degës së PS-së Shkodër, Zef Çuni, ish-zv.ministër i Kulturës në Qeverinë “Rama 1” dhe Astrit Beci, mjek i njohur në Shkodër dhe ish-deputet i PS-së.
Megjithatë do të jetë kryesia e PS që do të vendosë mes këtyre kandidatëve potencialë.
Valdrin Pjetri u tërhoq nga marrja e detyrës së kryebashkiakut pas publikimit të dokumenteve kur rezultonte se kishte qenë vitë më parë i dënuar në Itali për shpërndarje narkotikësh. Këtë fakt, Pjetri nuk e kishte paraqitur në formularin e vetëdeklarimit, çka solli vendimin e largimit.
Sipas kalendarit të miratuar në asamble, në 16 shtator PS do të futet në një proces zgjedhor të gjatë për të zgjedhur drejtuesit e rinj të strukturave. Procesi do të zgjasë 5 muaj, duke nisur me 15-ditëshin e parë të shtatorit, kur socialistët do të përgatitjen për mbajtjen dhe organizimin e zgjedhjeve për të kulmuar në votimin e delegatëve të Kongresit në janar të 2020.
Edi Rama nuk ka preferuar që të kërkojë një mandat tjetër për ndërtimin e partisë, por e ka zgjidhur me Statutin e Partisë. Sekretari organizativ, Arben Pëllumbi, është shprehur se “Kryetari i Partisë, pas një procesi zgjedhor të fituar, automatikisht e merr mandatin. Në rast se PS nuk do të kishte fituar, atëherë kryetarit i lind e drejta të hyjë në garë dhe do të kishte pasur edhe një proces për kryetarin”.
